Hainbat ekimen prestatu ditu Aiaraldeko Mugimendu Feministak Amurrio, Laudio eta Orozkoko jaietarako. Hala iragarri dute mugimenduko kideek Amurrioko Txosnagunean eginiko agerraldi bateratuan. Bertan eman dute abian jarriko dituzten tresna guztien berri.
Iragarri dutenez, Laudion eraso matxisten aurkako sare bat jarriko dute martxan jai egun guztietan, 24 orduz. Gauzak hala, 722162904 zenbakira deitu edo idazteko edo Laudioko Mugimendu Feministaren Instagram kontuarekin harremanetan jartzeko deia luzatu dute eraso bat jasan edo ikusten dutenei.
Amurrion ere 24 orduko txandak egingo dituzte bertako feministek, eta Tximeletak zentroaren telefonoa (650801080) baliatuko da erasoak salatzeko, eta baita Otsemeak taldearen Instagram kontua ere.
Orozkon, aldiz, brigada moreak antolatuko dituzte. "Jaietan zehar, zapi morea eramango duten pertsonak egongo dira, beraz, erasorik ikusi edo jasan ezkero, haiengana jo. Gainera, ostiral eta larunbat gauetan puntu morea ere egongo da", azaldu dute.
"Denon ardura"
"Gozamena erdigunean" egon behar dela aldarrikatzea izango da martxan jarriko diren tresnen helburu nagusia, baina nabarmendu dute horren ardura ez dela feministena soilik. "Denon ardura da espazioak nola hartzen ditugun berrikustea, albokoaren txistua moztea edo ditugun jarrerekiko erantzukizuna hartzea", aldarrikatu dute, ohartarazita indarkeriak "forma ezberdinak" hartzen dituela, "jaietan zein urteko egun guztietan".
Horri lotuta, salatu dute eurentzat ez dela gozagarria "ordu txikietan erasoak salatzen dituzten pankarten atzean eta txistu artean ikustea", iazko Laudioko jaietan gertatutakoa gogora ekarriz. Horren aurrean, "oholtzara igo eta pankartak ateratzeko prest" jarraitzen dutela ziurtatu dute, horretarako protokolo feministak martxan jarrita.
