Aurrera jarraitzen dute duela astebete piztu zen Lantenoko sutearen gaineko egonkortze eta zaintza lanek. Egoerak hobera nabarmen jo badu ere, oraindik ere lanak beharrezkoak direla azaldu du Aiarako Udalak ohar baten bidez.
Gaurko egunean helikopteroa arituko da inguruan eta, horrenbestez, Artziniegako igerilekuek itxita jarraituko dute beste egun batez, suhiltzaileek ura bertatik har dezaten. Egoerak horrela jarraitzen duen bitartean Artziniegako bizilagunek Aiarako udal igerilekuak erabiltzeko aukera izango dute.
Mendira hurbiltzeko debekua
Itzaltze lanek iraun bitartean, inguruko mendietara hurbiltzea debekatuta dagoela gogorarazi du Llantenoko Administrazio Batzarrak. "Ingurua lasaiago dagoela dirudien arren, langileek antolatzen jarraitzen dute, eta mendian jendea aurkitzeak lanak zailtze dizkie", azaldu du tokiko erakundeak bizilagunen artean zabaldutako oharrean.
Sutearen jatorria eta kalteak aztergai
Sutea behin kontrolpean, honen jatorria aztertzeari ekingo dio Arabako Foru Aldundiak. Iñaki Gurtubai diputatuak aste bukaeran egindako adierazpenetan Llantenoko sutea gizakiak eragindakoa izan zela azaldu zuen. Zehazteke dago oraindik modu boluntarioan sortua izan zen edo ez. Sua erabat itzalita dagoenean argituko da hori.