Larunbatean 09:00etatik aurrera ehunka txirrindularik eta zalek hartuko dute Reforra Amurrioko Ziklokrosaz gozatzeko. Berez, lasterketa puntuagarria da Espainiako Kopan eta, hain zuzen, 12:30ean emakumezko zein gizonezko juniorrak aterako dira, 13:30ean emakumezkoen elitea eta 14:45ean gizonezkoena.
Igandean Urduñan izango da hitzordua.
Ormaiztegin aiaraldearrak protagonista
Eskualdeko txirrindulariek zer esana izango dute larunbateko zein igandeko lehian, Ormaiztegin eta aurreko asteetan egindakoa ikusita. Izan ere, Iñaki Carro Master 40 kategorian irabazi zuen.
Carrok azpimarratu du oso zirkuitu gogorrean gailendu zela, bi aldapa oso gogorrak baititu eta eguraldiaren ondorioz, tarteka labainkorrak. Txirrindulariak hasieratik menderatu zuen lasterketa eta buruan jarri zen, abantaila gero eta gehiago handitzeko.
Carrok azpimarratu du Izagirre anaiek antolatzen dutela proba eta, gainera, Jon Izagirre eta Pello Bilbao erretiratu zirela egun horretan, ohiko giro ona are beroagoa bilakatuta.
Master 40ko kirolariak ez ezik, Mikel Llorente amurrioarrak ere lortu zuen tokia podiumean eta bigarren izan zen juniorren artean. Llorenteren asmoa da ahalegina egitea Euskadiko txapelduna izateko eta Espainiakoan ere sailkapen ona izateko.
Mirari Gotxik bosgarren zeharkatu zuen helmuga eta oso balorazio positiboa egin du: "Irteera ona egin nuen, eta lehenengo hamar postuen artean kokatzea lortu nuen. Lehenengo itzulietan aurrera egin, eta banekien nire irismenetik kanpo zeuden lau eliteko txirrindulariak bistatik galdu nituen. Frantziar txirrindulari batekin borroka polita izan nuen, eta azken itzuli eta erdiaren faltan berarengandik aldentzea lortu nuen, helmugara bakarrik iritsiz. Bereziki ilusioa egin zidan, borrokatzeko gai izan nintzen guztiagatik, eta horrek konfiantza ematen dit hurrengo lasterketei begira".
Ibai Colmenerok ere lan txukuna egin zuen eta zazpigarren sailkatu zen. Gazteak denboraldiaren balorazio ona egin du, hiru aldiz igo baita podiumera; duela bi asteburu birritan eta aurretik Oviedon.
Buruan Amurrion ahalik eta hoberen dauka une hauetan eta Espainiako Kopako azken bost lasterketetan fin ibiltzea.
