Eusko Jaurlaritzako Industria, Trantsizio Energetiko eta Jasangarritasun Sailak urriaren 16an onartu zuen Ferosca I zentral eolikoari aurretiazko administrazio eta eraikuntzarako baimena ematea.
Edonola ere, gogoratu beharra dago Laudio eta Aiarako udalerriei eragiten dien proiektuak ez duela lortu Plan Berezia aurrera egitea. Hain zuzen, aipatutako Udalek plan hori euren gain hartzeari uko egin ostean, Aldundiak hartu zuen ardura eta ondorioztatu zuen zentral eolikoaren Plan Bereziak indarrean dagoen hirigintza araudia urratzen duela eta gabezia horiek ezin direla konpondu. Gauzak horrela, plana ezeztatu zuen.
Prozesu independenteak
Jaurlaritzak berak zabaldutako dokumentazioan argitu du emandako baimena osagarria dela beste prozesuarekiko eta zerikusia duela sektore elektrikoaren betebeharrekin.
Hau da, hirigintzari lotutako Plan Bereziaren ukazioak proiektua gelditu dezake oraindik, Udalek galarazi dezakete eta.
Edonola ere, azpimarratu beharra dago Feroscak epaitegira eraman duela Plan Bereziari buruzko erabakia.