Duela hiru urte ekin genion Aiaraldea Komunikabidetik podcastak ekoizteari. Horren adibide dira Azalera magazina eta Hurrengo Geltokia elkarrizketa saioa, baina baita Bazter Itxia programa ere. Azken saio hori Laudioko gazte batzuk ekoizten dute, euren motibazio eta gogoen arabera. Aiaraldea Komunikabidetik azpiegiturarekin eta arlo teknikoan laguntzera mugatzen gara, baldintza bakarra jarriz: saioa euskaraz izatea.
Orain, urrats bat harago joateko asmoa dugu. Ahots gehiagoren bila gabiltza, podcast gehiago planteatu eta, modu horretan, euskaraz ingurune digitalean duen presentzia handitzeko helburuarekin.
Zer deritzozu? Animatzen zara urratsa eman eta mikro aurrean jartzera? Eskualdekoa bazara eta saioren bat ekoiztea baduzu buruan ez izan zalantzarik eta jarri gurekin harremanetan honako bide hauetako baten bidez: erredakzioa@aiaraldea.eus helbide elektronikoa edo 688 84 81 52 telefonoa (dei edo WhatsApp mezu bidez).
Tailer irekiak abenduan
Aurreko ekimenari lotuta, tailer irekiak antolatuko ditu Faktoriak abenduko astelehenetan, 18:30ean Faktorian. Saio horien helburua izango da podcasten ekoizpenen inguruko oinarrizko ezagutzak erakustea, motorrak eta gogoak berotzeko helburuarekin.
Saio horiek ireki eta doakoak izango dira, baina beharrezkoa izango da aurreytik izena ematea, goian jarritako telefono edo emailera izen abizenak eta adina bidalita.