Amurrioko Udalak euskara sustatzeko herritarrei ematen dizkien diru-laguntzen eskaerak aurkezteko epea urrian zehar egongo da zabalik eta hilaren 31n bukatuko da. Eskaera erregistratu aurretik, herritarrek udaletxeko Euskara Zerbitzura eraman beharko dute, bertan egiazta dezaten.
Begirale ikastaroak
Udalak arlo honetan hainbat diru-laguntza ematen du. Besteak beste, herritarrek aisialdiko begirale- eta zuzendari-titulu ofizialak lortzeko ikasketak euskaraz egin ditzaten laguntza ekonomikoak.
Amurrion erroldatuta dauden eta ikastaro osoa euskaraz egin duten pertsonek aurkeztu dezakete eskaera, egindako ikastaroak 200 ordu teoriko izan baditu, gutxienez. Gehienez jasoko diren laguntzak hauek dira; 200 euro monitore-ikastarorako eta 90 zuzendari-ikastarorako.
UEUko ikastaroak
Bestalde, Udako Euskal Unibertsitateak antolatutako euskara-ikastaroetan parte hartu izanagatik ere laguntzak eskaintzen ditu Udalak. Horiek jasotzeko Amurrion erroldatuta egon eta 16 urtetik gora izan behar dituzte interesdunek.
Gainera, ikastaroaren %80 edo gehiagora bertaratu direla egiaztatu beharko dute. Gehieneko diru-laguntza matrikularen %50a izango da eta, gehienez, 100 euro eskatzaile bakoitzeko.
Euskara ikasteko bekak
Euskara ikasteagatik ere diru-laguntzak eskaintzen ditu Udalak. Ikastaroak irauten duen bitartean Amurrion erroldatuta egon diren eta 16 urte beteta dituzten pertsona fisiko orok egin dezake beka jasotzeko eskaera, euskara-eskolen %80a edo gehiagotara bertaratu direla egiaztatuta.
Gehieneko diru-laguntza matrikularen %75a izango da eta, gehienez, 1.961,06 euro eskatzaile bakoitzarentzat, euskalduntze-prozesu osorako.
Kasu guztietan eskaera-inprimakia, beste finantzaketarik jaso ez duela adierazten duen zinpeko deklarazioa barne hartzen duena, egindako ordainketaren egiaztagiria eta bertaratze-ziurtagiria aurkeztu beharko dute. Informazio gehiago eskuratu daiteke www.amurrio.org webgunean edo Euskara Zerbitzuan.