Amurrioko Udalak eta herriko Musika Eskolak Diego Martín orkestra zuzendaria omendu zuten. Ekitaldi publikoa larunbatean izan zen, udaletxean, Amurriok EMUSIK Europako musika eskolen Jaialdia hartu zuenean Juan Urrutia plazan.
Josune Irabien alkateak "Amurrioko enbaxadorea da, Amurrioko izena lau haizeetara zabaldu du" azpimarratu zuen, izan ere, nazioarteko hainbat sari jaso ditu aiaraldearrak azken urte hauetan. Besteak beste, Tokioko Zuzendaritza Nazioarteko lehiaketa irabazi zuen iaz. Gainera, "transmititzen dituen baloreak eskertzekoak dira" gehitu zuen Irabienek. Halaber, "oso langile profesionala" dela adierazi zuen bere diskurtsoan.
Musikaren omenaldia
Amurrioko Udal Musika Eskolako zuzendaria den Pedro Basterrak ekitaldia aprobetxatu zuen Martin zoriontzeko eta eskolak herrian eta eskualdean egiten duen lana nabarmentzeko. "Jendeak pentsatuko du udal eskola diru gastu bat baino ez dela, baina Diego Martin bezalako arrakasta kasuak ikusita, badakigu egiten ari garen horrek zentzua duela". Hala ere, Basterrak adierazi zuen arrakasta ez dela soilik profesionala izan behar, "Gure helburua da pertsona bakoitzak musikaren munduan bere txokoa aurkitzea, profesionalki edo zaletasun moduan bada ere. Gure lanak zentzu handia dauka."
Musika Eskolak ezusteko oparia egin zion orkestra zuzendariari eta bere ikasle garaiko hiru kidek Verdiren pieza bat interpretatu zuten berarentzat. Bestetik, Amurrioko Udalak batuta bat oparitu zion Diego Martini esker onean. Tresnak "Amurrio lau haizeetara" mezua grabatuta zuen.
Diego Martinek, bere aldetik, “esker onekoa” zela adierazi zuen, “izan ere jendearen maitasuna sentitzeak indar handia ematen du. Gainera, oso berezi da zuen ahotik entzutea eredu ona naizela”. Hunkituta, zuzendariak ‘enbaxadore‘ izatearen lan hori gustora onartu zuen, “Amurriokoa naiz eta hala izango naiz beti”