Amurrioko Udalak zenbait obra aurreikusi du landa eremuan. Hasteko, Mendigurengo bidea konponduko dute, urte luzez mantenu lanak ez baitira egokiak izan.
Aldaiturriaga bidetik eta Agirre baserriaren arteko zatian drainatzea berritzeko lanak eta azaleko birprofilaketa-lanak egingo dira, urtea bukatu baino lehen. Aurrekontua 15.999,83 eurokoa da.
Mendiak
Bestalde, abeltzaintza jarduera eta herritarren segurtasuna bermatzeko, hurrengo ekimenak gauzatuko dituzte:
- Baso- eta artzain-itxitura: itxitura perimetral berria instalatzea (metro bateko sarea eta goiko txarrantxa, akazia edo gaztainondoko zurezko hesolak) Peña Negra Elexazar izeneko mendi publikoaren hegoaldean. Mendi hori, Amestio errekatik San Roke baselizaren inguruetaraino doa. Inbertsioa, gehienez, 7.000€-koa izango da.
- Pasagune kanadarra: itxitura perimetralaren lagungarri den sistema, Pendiente izeneko mendi-bidean instalatuko omen dena. Bidearen noranzkoarekiko zeharka jarritako metalezko barra edo burdin sare paraleloko parrila jarriko da horizontalean eta arrasean, menditik datozen abereak sar eta irten ez daitezen, baina ibilgailu eta oinezkoen mugimendua eragotzi gabe. Inbertsioa, 8.470€-koa.
- Uraska: Hormigoizko aska artifiziala jarriko da ur-azaleratze baten gainean Peña Negrako bazkalekuan. Inbertsioa, 2.000€-koa.
Naturbide
Halaber, udalerriko mendietako natubide edo bidegorriei dagokienez, bi pasabide eraikiko dira Mariaka eta Altarreketa errekek okupatutako espazioan, horietatik bizikletak nahiz oinezkoak igaro daitezen. Bi pasabideak eraikitzeko inbertsioa 11.146,52 eurokoa izango da.