Amurrioko EAJko kideek aho batez adostu dute Josune Irabien Marigorta izatea EAJren alkategaia 2019ko udal-hauteskundeetan.
Ia zortzi urte daramatza Irabienek Amurrioko alkate gisa. Zientzia Politikoetan lizentziatua da, eta Eudeleko Batzorde Eragilean eta Virginia Woolf Basqueskolan ere dago.
“Euskaltzalea, emakumeen eskubideen eta Amurrio bezalako herri bat handi egiten duten herritarren kezka, behar eta ardurak ezagutzeko aukera luzatzen duen gertuko eta entzute etengabean oinarritutako ereduaren borrokalari sutsua da Irabien”, azaldu dute jeltzaleek euren erabakiaren berri emateko helarazitako oharrean.
EAJko kideek aurreratu dute honakoak izango direla hurrengo lege-agintaldiari begira Irabienek izango dituen helburuak: “Adostasuna eta parte hartzea sustatzea, bere behar eta helburuekin bat datozen udalerriko euskarriak sendotu dituen kudeaketa bermatzaile baten eredua ezartzea, eta herri iraunkor, euskaldun, lagunkoi, konprometitu, ekintzaile, irisgarri, anitz eta, batez ere, bere buruaz harro den herri bateko kide izatearen ilusioa amurrioarrek bizirik manten dezaten, buru-belarri lan egitea”.