Yolanda Muñoz gasteiztarrak izango du Mendiko Lagunak taldeak antolaturiko Mendi Jardunaldien egitaraua irekitzeko ardura. Ostiralean izango da zita, 19:30ean. Irakaslea eta bidaiazalea da Muñoz; Europa, Errusia eta Asian barrena bizikletaz bidaiatzen igaro ditu azken bi urteak. Bertan bizitakoak kontatuko ditu “Ikusmundu bizikletan” hitzaldian.
Azaroaren 17an, aldiz, Pipi Cardel Grandako alpinista eta eskalatzaileak hitzaldia eskainiko du 20:30ean. Altueran zabaldutako eskalada bideetaz mintzatuko da. Denis Urubko Kazajistaneko alpinista ospetsuarekin 1.600 metrotako bide berria zabaldu zuen Ushaba mendietan abuztuan. Kaukason bakarrik ez, Karakorumeko mendietan ere halakoak egin ditu Cardelek.
Azaroaren 21ean, asteazkena, Euskal Mendizale Federazioak mendiko segurtasun eta prebentzioari buruzko formazio saioa eskainiko du 19:00etan. Azaroaren 23an, aldiz, Himalaiatik itzuli berri diren “Oxigenoa Euskarari 6.000 metrotan ere” proiektuko kideak arituko dira, 19:30ean.
Jardunaldiak larunbatean bukatuko dira, azaroaren 24an, 20:30ean. Piriniotan barrena bizikleta eta alpinismoa uztartuz egindako zeharkaldiaz mintzatuko da Mikel Latorre amurrioarra. Altueran bizi diren herrizketako nekazal proiektuak laguntzeko baliatu du ibilaldia Latorrek. Jarraian, jardunaldiei amaiera emanez, azaroaren 4an burutu zen XXXII. Gorobel Ibilaldiko argazki eta bideo laburren proiekzioa eta sari banaketa egingo dira.