Ertzaintzak jakinarazi berri du gaur goizean igaro dela epaitegitik atzo atzeman zuten Polizia Nazional ohia, eta libre utzi duela epaileak, fiantzarik ezarri gabe. Epaileak erabaki du bi delitu inputatzea akusatuari: tiro egitea eta legez kanpoko armak izatea. Gainera, lizentzia eta armak kendu dizkiote.
Atzo goizean atxilotu zutenetik polizia etxean egon da akusatua eta gaur eraman dute epaitegira.
Arma eta munizio ugari etxean
Ustezko erasotzaileak 74 urte ditu eta Polizia Nazional ohia da. Asteazkenean bere etxea miatu zuen Ertzaintzak eta 30 arma inguru topatu zituen, motzak zein luzeak. Gehienak ez dute funtzionatzen eta egoera txarrean daude. Munizio ugari ere topatu zuten poliziek, eta baita hainbat artilleria-pieza ere.
Erasotutako familiarekiko elkartasun keinuak
Urtarrilaren 6an jazo zen tiroa. Une horretan, familiako bi kide zeuden sukaldean. Biktimek hasieratik argitu zuten ez zutela inolako liskarrik auzokideekin.
Erasotuek jasotako babes guztia eta elkartasun mezuak eskertu zituzten atzo, Aiaraldea hedabideari egindako adierazpenetan. Izan ere, Amurrioko Udalean aritzen diren talde politiko guztiek salatu dute gertakaria eta asteartean elkarretaratzea egin zuten. Hori ez ezik, Sortuk manifestazioa deitu zuen egun berean gorroto delitua salatzeko, eraso politikoa, alegia.
