Hirugarren aldiz irabazi dituzue hauteskundeak, nola baloratzen dituzu lortutako emaitzak?
Balorazio pausatuagoa egin behar badugu ere, balorazio positiboa egiten dugu. Gobernatzeak desgastea ekartzen duela jakin badakigu, baina kasu honetan herritarrek urte hauetan egindako lana ondo baloratu dutela ikusi dugu, eta horrek asko pozten gaitu.
Gehiengo absolutua ez duzuela ikusita, akordiorik aurreikusten duzue?
Hirugarren aldia da hauteskundeak irabazten dituguna, lehenengo bietan ere ez dugu gehiengorik izan, eta saiatu gara guztiekin lan egiten, akordioak erdiesten. Ohituta gaude negoziatzen, orain arte ez dugu legealdi osorako itunik izan, eta aukera hori ere baloratu beharko dugu, talde bakoitzaren programak ikusita, zertan gauden ados... Hurrengo egunetan balorazio zehatzagoa egingo dugu eta horren arabera jokatuko dugu.
Preferentziarik duzue?
Ez, ez dugu izan eta orain ere ez dugu. Pozten naiz Amurrio abertzaleago bat ikusten dudalako, eta hori zoriontzekoa da. Puntu asko ditugu komunean, horietan lan egin nahi dugu. Ekainaren 15ean udalbatza osatu eta alkatea izendatu beharko da, ikusiko dugu zer gertatzen den bertan, eta horren arabera jokatu.