Igande goizean ohikoan baino asaldatuago esnatu zen Amurrioko Izarzako zonaldea. Goizeko hamarretatik aurrera dozenaka lagun bildu ziren bertan dagoen basozainaren etxe ohian, arkuak eskuetan eta fletxak zorroetan, Goikomendi Sariketari hasiera emateko prest.
VIII. edizioa izan da aurtengoa. Zortzi urtetan ezinbesteko zita bilakatu da norgehiagoka hori Euskal Herriko arkularientzat. “EAEn aurten egin den arku-tiro probarik jendetsuena izan zen igandekoa, 83 pertsonek hartu zuten parte”, nabarmendu du Josemi Elejalde antolatzaileak.
Amurrio Arku Kirol Taldeko kideak positiboki baloratu du aurtengo edizioa: “eguraldiak lagundu egin zuen, azken unean soilik egin baitzuen euria”.
Entrenamenduak
Hiruzpalau norgehiagoka antolatzen ditu Amurrioko taldeak urtero, hainbat modalitatetakoak: aretokoak (kiroldegian), dianetakoak, libreak eta basokoak.
Egunerokoan, aldiz, entrenatzeko batzen dira Refor industriaguneko zelai batean. “Astearte eta ostegun arratsaldetan egiten ditugu saioak”, azaldu du Elejaldek, eta herritar orori luzatu dio gerturatzeko gonbita. “Kirola probatzen uzten dugu, ekipamendua utzita. Gero, jarraitzen dutenek eurena eskuratzen dute, baina ez da garestia”.
26 urteko ibilbidea
Duela 26 urte sortu zen Amurrio Arku Kirol Taldea. “Lau arkulari bertaratu ziren herrira Urkabustaiztik eta kirola irakasteko tailer bat antolatzea proposatu zioten udalari”, oroitu du Elejaldek, “15 pertsona bertaratu ginen ikastaro horretara. Arrakasta handia izan zuen eta bigarren edizioa antolatu zuten. Ondoren, 11 pertsona bildu eta taldea sortu genuen”.
Orain askoz gehiago dira taldean: “9 ume daude eta 54 heldu. Araban bost klub daude, eta gurea da handiena".