Asier Benito amurriorrak lehen aldiz egin du gola 2. mailan, 10. jardunaldian, hain zuzen. Ponferradinako estadioan izan zen larunbatean Mirandes klubaren aurka. "Atezainaren aurrean geratu nintzen, driblin baten bidez atzean utzi nuen eta gola sartu", azaldu du jokalariak.
Gola 93. minutuan heldu zen eta polemikarekin, gainera. Asier Benitok berak azaldu dio Aiaraldea hedabideari: "Var-a eman zidan gola. Hasieran jokoz kanpokoa zela adierazi zuen epaileak eta ezin izan nuen behar den bezala ospatu nire lagunekin, bertan zeudela zelaian partida ikusten. Baina gero ia 4 minutu egon ziren begiratzen Var-ean ea gola legezkoa zen edo ez jakiteko. Azkenean, gola eman zidaten".
Eibar taldetik Ponferradinara
Asier Benitok ibilbide luzea egin du jadanik futbol profesionalean. Hasteko Alavesen ibili zen, bigarren taldean, gehienbat, eta gero Bilbao Athleticera egin zuen salto.
Uda honetan SD Eibar klubak fitxatu zuen eta aurredenboraldia Jose Luis Mendilibar eta Iñaki Bearen aginduetara egon da. Berez, 4 gol sartu zituen udan eta Ponferradinaren interesa erakarri zuen. 11. sailkatuta dago orain taldea.