Sindikatuen eta zuzendaritzaren arteko bilera hasi da gaur 10:00ak aldera Tubos Reunidos enpresan eta eguerdira arte luzatu da. Batzarrean jabeek adierazi dute lan enplegurako espedientea hasiko dutela bihar, ezinbesteko arrazoiak direla medio.
Printzipioz, osasun larrialdia amaitu arte iraungo du espedienteak eta lan erakundeek 5 egun dituzte onartzeko. Enpresak gaineratu du atxikituko dela Espainiako Gobernuko neurri guztietara, ekonomiaren sostengurako.
Neurriak suposatzen du jarduera osoa geldituko dela, baina gradualki. Izan ere, labea ezin da gelditu bat-batean kalte larriak eragin gabe. Gauzak horrela, bihar goizeko 06:00etan lantegia hutsik egongo da eta segurtasunerako zein bulegoko gutxiengo zerbitzuak ezarriko dituzte.
Zuzendaritzak bermatu du segurtasun eta prebentzio elementuak egongo direla eta langileek topo ez egiteko irteeran, ordutegi malgua ahalbidetuko du.
Goizean, Tubos Reunidos enpresako langileek jarduera geratu dute faktorian. Berez, altzairutegia ez konprometitzeko beharrezkoak diren lanpostuek bakarrik jarraitu dute jardunean.
Gainerako beharginak elkartu egin dira zuzendaritza eta sindikatuak bildu bitartean.
Aiaraldea hedabideari azaldu diotenez, langile ordezkariek ekoizpena etetea eskatu dute, enpresako prebentzio protokoloak ez baitu errespetatu Lan Arriskuen Legea (adibidez, ezin izan dute jantokia erabili, eta lantegiko edozein txoko baliatu behar izan dute ogitartekoa jateko) eta gutxieneko distantzia ez da bete zenbait ataletan (mantenuan, adibidez) koronabirusaren zabalpena ekiditeko.
