Gaur elkartu dira Tubos Reunidos lantegiko zuzendaritza eta enpresa batzordea. Konpainiako arduradunek adierazi dute ekainaren 1etik urriaren 31ra arte enplegua erregulatzeko espedientea indarrean jarri nahi dutela.
Neurriak 624 langileri eragingo lieke, baita eszendentzian dauden 4 beharginei ere. Abuztuan espedientea bertan behera utziko dute eta, gehienez, lanaldiaren %63,7an murriztuko dute jarduera. Hau da, gehienez 52 egunez ez dute lanik egingo hurrengo hilabeteetan lantegiko kontratatuek.
Zuzendaritzak azaldu du COVID-19ak sortutako krisialdiari aurre egin nahi diotela horrela. Tubos Reunidoseko adituek uste dute egoera 2021eko ekainera arte luzatuko dela, baina hobera egingo balu, moldatuko lituztekete lanaldiak.
Sindikatuen kritikak
Iturri sindikalek salatu dute espedienteak eragin handia izango duela fabrikako langileei dagokienez; bulegoetan zein tailerretan -salbu lana dagoen batzuetan-. Izan ere, bakarrik zuzendaritza bera eta bere inguruko jendea, antza, neurri horretatik kanpo geratuko dira.
Zentzu horretan, enpresa batzordeko iturriek gogor kritikatu dute koronabirusaren alarma egoerak iraun bitartean lantegiko beharginek fabrikan egon direla bere ardurarak betetzen, baina orain arriskua leundu dela, etxean geratu beharko direla.
Zentzu horretan, eskatu dute espedienteak neurri berean eragitea Tubos Reunidoseko atal guztietan eta zuzendariek ere lanaldia murriztea. Izan ere, LAB sindikatuak aipatu du zuzendaritzak 1.823.000 euro kobratzen dituela urtero. Are gehiago, sindikatuak nabarmendu du azken bi urteetan soldata bikoiztu dutela, nahiz eta enplegua erregulatzeko espedientean egon enpresan.
