Tubos Reunidos enpresa 4. espedientea prestatzen ari da Amurrioko lantegian enplegu erregulatzeko, COVID-19 birusari lotuta. Printzipioz, prozedura formala hasiko du maiatzaren 21ean, eta ahalik eta lasterren biltzeko borondatea erakutsi dio langile batzordeari.
628 langileri eragingo die neurriak, horietako 4 eszedentzian daude. Gehienak Amurrioko beharginak dira eta beste batzuk Trapagako bulegoetan dute lantokia.
4 espediente jadanik
Konpainiak enplegua erregulatzeko lehen espedientea abiatu zuen martxoan, "indarrezko" arrazoiak argudiatuta. Eusko Jaurlaritzak ez zuenez onartu, ekoizpen argudioak baliatuta, beste espediente bat landu zuten. Hala ere, helegitea jarri zuten, lehenengo eskaera aintzat hartu zezan Jaurlaritzak.
Erakunde autonomikoak ekarpena ontzat eman zuen gero; eta ondorioz, bigarren espedientea bertan behera geratu zen. Handik gutxira, maiatzaren 4an, Tubos Reunidos enpresako langile guztiak lanera itzuli ziren, hasierako espedientea ere bertan behera utzi baitzuen zuzendaritzak, nahiz eta uztailera arte luzatzeko asmoa izan.
Maiatzaren 6an, ordea, konpainiako agintariek adierazi zieten sindikatuei beste espediente bat aurkezteko asmoa zutela, eta egitasmo hori ere ezerezean geratu da berriki iragarri duten 4. espedientea dela medio.
Salaketa prebentzio neurrien ondorioz
Enpresako langile batzordea Lan Ikuskaritzarekin jarri da harremanetan Tubos Reunidoseko lantegian dauden prebentzio neurriak direla eta. Sindikatuen aburuz, irizpide oso orokorrak erabilita eta inprobisatuta itzuli dira beharginak lantokira, eta ez da gutxieneko segurtasuna bermatzen.
Gauzak horrela, langile bat etxera joan zen ostiralean sukarra zuelako, eta bere lankide batek salatu zuen ez ziotela jakinarazi, nahiz eta bere lanpostua hartu zuen.
Horrez gain, asteburuan beste 4 langilek utzi behar izan dute faktoria. Batek COVID-19ko balizko sintomak zituen, eta beste hiruak harremana izan dute eriarekin, maskarillak erabili gabe. Sindikatuek azpimarratu dute hori guztia gertatu dela ez direlako ganorazko prebentzio hartu.
