Asteburu bizia izango du Iker Larrazabalek kirolaren esparruan. Hasteko, Jon Erasun Zizurkilgo pilotariaren kontra lehiatuko da Ataungo Auzoeta frontoian ostiralean, Eskuz Banakako Promozio Txapelketan, hain zuzen.
Edonola ere, hitzordurik garrantzitsuena larunbatean izango da Amurrion bertan. 17:30etatik aurrera herriko pilotalekuan Oinatz Bengoetxeak Asier Agirreren aurka jokatuko du, eta gero Aimar Olaizaola eta Endika Uriondo berriro neurtuko dira Iker Larrazabal eta Ander Imazekin.
Norgehiagokak urriaren 18ko partida berpiztuko du, zeinean Larrazabalek eta Imazek irudi ona utzi zuten, emaitza estuarekin galduta Miribillako Bizkaia Frontoian. Sarrerak salgai daude hemen.
18 urterekin, Iker Larrazabalek pasa den denboralditik entrenatzen du jokalari profesionalekin, baina pilotarien grebak eta gatazkak epaitegietan bukatzeak ireki dio atea puntako kirolariekin aritzeko.
