Adierazpen instituzionala sinatu dute Amurrioko EAJ, Orain Amurrio eta EH Bilduren udal taldeek, Madrilen gaur bertan abiatuko den Galder Barbado amurrioarraren eta Aitor Zelaia gasteiztarraren aurkako epaiketaren harira. Hiru udal taldeek "kezka" adierazi dute fiskaltzaren zigor eskaeren aurrean. Izan ere, azken honek 8 urteko espetxe zigorra eta 7 urteko baldintzapeko askatasuna eskatu du bi gazteentzat.
Adierazpenaren sinatzaileen iritziz, horrelako jarduerak oztopo dira normalizazio-prozesuan, eta herriaren bizikidetza nahia oztopatzen dute. "Uste dugu funtsezkoa dela eskubide guztien defentsa herritar guztientzat, justizian eta bakean oinarritutako oraina eta etorkizuna eraikitzeko", adierazi dute EAJk, Orain Amurriok eta EH Bilduk.
Epaiketa Madrilen
Gaur hasi eta bihar arte luzatuko da Galder Barbado eta Aitor Zelaia gazteen aurkako epaiketa Madrilgo Auzitegi Nazionalean. Fiskala Altsasuko gazteen auzian egondako berdina da eta Angela Murillo izango da epailea. Azken asteetan hainbat elkartasun dinamika burutu dira Amurrion eta Gasteizen bi auzipetuei babesa adierazteko eta hurrengo egunetarako ere mobilizazioak aurreikusten dira.
Atzo abiatu ziren bi auzipetuak Madrilera, eta Armiñonen jaso zuten azken agurra, hainbat senide, lagun eta herritarren partetik:
Arabako militanteon berotasunarekin bagoaz Armiñonetik Madrilera bidean.
— Maddi Isasi Azkarraga (@maddisasi) January 20, 2021
Aitor eta Galder aske eta gurekin nahi ditugu!#ANkerkeriariSTOP pic.twitter.com/jl0QivaRDh