San Anton plaza elkartasun eta maitasun gune bilakatu dute gaur Amurrion. Ostegunean hasiko da Galder Barbado eta Aitor Zelaiaren aurkako epaiketa, eta babes ekimena antolatu dute horren harira.
Plaza bete jende, ANkerkeriari Stop eragileko ordezkariek hartu dute hitza ekitaldian lehenbizi. "Plaza honetan salatu ditugu herri honek aspalditik sufritzen dituen kolpe eta ankerkeria guztiak", azpimarratu dute bozeramaileek.
Alfredo Remirezen espetxeratzea, Julen Ibarrolarena edota "polizia nazional ohi batek ezker abertzaleko famila baten etxeari tiro egin zionean" egindako mobilizazioak ekarri dituzte gogora: "Ankerkeria askok atera gaituzte hona, baina hau guztiaren gainetik elkartasunaren, borrokaren eta maitasunaren plaza da!". Hala, maitasun eta esker mezu andana helarazi dizkiote bertaratutakoek Galder Barbadori.
Galder Barbadoren esker hitzak
Azken egunetan jasotako babes andana eskertu du, besteak beste, Galder Barbado Bonillak bere hitzartzean. "Plaza honetan elkartzen garen aldiro, nahiz eta beldur eta dardara eragin, norberaren onena ateratzen da".
Herriari ere mintzatu zaio: "Amurrion bakean bizi nahi dugu. Hau herri euskaldun, feminista, solidario eta langilea da. Horregatik kolpatzen gaituzte behin eta berriz, eta horregatik jarraitu behar dugu bide beretik".
"Terroristak", Barbadoren hitzetan, pandemiaren erdian argiaren prezioa igo dutenak dira, "inolako laguntzarik eskaini gabe ostalaritza eta komertzioak ixten ari direnak edota mediku eta irakasle gehiago kontratatu ordez polizia gehiago kontratatzen dituztenak". "Halakoak gertatzen diren bakoitzean herri honetan independentista gehiago ateratzen dira".
Etzi ekingo diote Galder Barbado eta Aitor Zelaiaren auziari. Indartsu joango da amurrioarra, ordea: "Ez gaituzte bidetik aterako, nahiz eta horretan tematu. Mila esker, zuen irudia ikustea gaur Madrilera joan baino 2 egun lehenago gasolina da guretzat. Ziur egon irabaziko dugula, jarraitu borrokan! Gora euskal gazteria! Gora Euskal Herria askatuta! Gora Amurrio!".
"Ziur egon irabaziko dugula!" mezuarekin agurtu da Galder Barbado gaztea, Amurrion @ANkerkeriaSTOP plataformak antolatutako ekimenean: pic.twitter.com/K1TCTgpynU
— Aiaraldea.eus (@aiaraldea) January 19, 2021
Ostiralean, manifestazioa
ANkerkeriari Stop plataformako ordezkariek iragarri dutenez, manifestazioa egingo dute ostiralean 18:00etan Amurrion epaiketa salatzeko.