Mozioa aurkeztuko du Orain Amurrion hurrengo Udal Osoko Bilkuran, Amurrioko garbiketa publiko bihurtzea eskatzeko, zerbitzu horren esleipenaren berritzea hurbil dagoelako. Bi gauza eskatuko dituzte talde politikoko kideek: zerbitzu hori udalekotzeko egokitasun zein bideragarritasun txostenak osatzea eta foro bat sortzea gaiaz hitz egiteko. Proposamen zehatz bat jarri dute mahai gainean: Garbiketa Amurrio Bidean elkartearen bidez egitea, merkataritza-sozietate hori %100 udalarena delako.
Orain Amurriok salatu duenez, une honetan zerbitzu hori kudeatzen duen enpresa pribatuak ez du garbiketa egokia egiten. “Gainera, garbiketa lanak egiten dituzten langileak ere kexu direla jakin dugu”. Udal eraikinen garbiketa ere udalak berak kudeatzea eskatu du oposizioko taldeak, gaur egun “10 kontratu eta enpresa ezberdinekin” egiten direlako.
Garbiketa Amurrio Bidean merkataritza-sozietatearen bidez egitea proposatu du Orain Amurriok
Talde politikoak gogorarazi du Toki Araubidearen Oinarriak arautzen dituen legeak zerbitzu publikoak “ahalik eta modu eraginkor eta efizienteenean kudeatzea” eskatzen duela. “Halaber, zerbitzuak emateko kontratuen adjudikazioari buruzko Europako Zuzentarauak argi eta garbi azaltzen du agintaritza bakoitzak zerbitzuak emateko era erabakitzeko askatasuna duela, betiere kalitate, segurtasun eta irisgarritasun ekonomiko handia eskainiz, besteak beste”. Efizientzia neurtzeko “giza errentagarritasuna bere osotasunean” neurtu behar dela nabarmendu dute Orain Amurrioko kideek, Europako Estrategia 2020k hala jasotzen duela argudiatuta. “Gure kale eta gune publikoetako garbiketari buruzko kexak ugariak dira eta arazo horiek udalerriak enpresa esleipendunak -etekina helburu nagusi duena- baino hobeto konponduko dituelako uste sendoa dugu”.
Orain Amurrioko kideek aitortu dute zerbitzua publiko bihurtzeko prozedura ez dela erraza, “ez samurra”; baina nabarmendu dute udalari dagokiola hori burutu ahal izateko baliabideak jartzea.
Cespa enpresa
Cespa enpresak kudeatu du Amurrioko kaleen garbiketa azken 4 urteetan. Ferrovial eraikuntza talde espainiar erraldoiaren filiala da, eta Aiarako Kuadrillako hondakinen bilketa ere kudeatzen du. Hain zuzen, tokiko erakunde horrek 72.300 euroko isuna jarri zion iaz enpresari, hondakinen bilketan kontratua ez betetzeagatik.
Orain Amurrio taldeak, bere aldetik, urte ugari daramatza garbiketa zerbitzua publiko bihurtzea eskatzen, beste zerbitzu batzuekin batera (Bañueta kiroldegiaren kudeaketa, kasu).