Atzo arratsaldean udalbatza egin zuten Amurrion eta 2021eko aurrekontuak onartu zituzten. EAJko taldeak proposatutako egitasmoak PSE-EEren babesa eskuratu zuen, eta EH Bilduren abstentzioari esker ere egin zuen aurrera.
EAJk poztasunez hartu du 15.401.948 euroko proposamenak babes nahikoa izatea. Udal Gobernu Taldeak azpimarratu du aurrekontuen %16,15a inbertsioetara bideratuko dela. Guztira, 2.487.700 euro. Zehazki, alkateak hurrengo proiektuak aipatu ditu: "Larrabe zabortegia zigilatzea (663.000 €); hornikuntza-sareak berritzea (542.500 €); Etxegoienbidea aparkalekua (300.000 €); ludoteka egokitzea (185.000 €); argiteriaren eraginkortasuna hobetzea (133.000 €) eta tenis-pistak (100.000 €), horiek dira 100.000 eurotik gorako inbertsioa dutenak". Bide batez, jeltzaleek uste dute onarpenarekin udalak ematen dituen zerbitzu guztiak bermatu direla.
David Romero PSE-EEko zinegotziak azpimarratu du, aipatutakoaz gain, gizarte ongizatean %2an igo dela gastua. Sozialistak enpleguan, Emakumeen Etxeari buruzko diagnosia eta tokiko merkataritza sustatzeko egingo diren inbertsioak ere goraipatu ditu.
Adostasuna
PSE-EEren aldeko botoa ez ezik, nabarmentzekoa da EH Bilduren abstentzioa. Horretarako, EAJk eta koalizioak akordioa lortu dute eta aste honetan bertan iragarri zuen EH Bilduk hori.
Orain Amurriok, ordea, kontrako botoa eman zuen, aurreko astean egitasmo osoa zuzentzea proposatu baitzuen. Besteak beste, talde horrek salatu zuen partaidetzarako tarte gutxi egon zela eta azpikontratazioen bidea jorratzen zela.