Gaur goizean mobilizazioa egin dute LAB eta ESK sindikatuek Tubos Reunidos taldearen bulegoen aurrean. Amurrio eta Trapagako lantegietako beharginak batu dira bertan eta horiei gehitu dira ITP zein Tubacexeko beste hainbat ere.
Langile ordezkariek testua eman diote konpainiako zuzendaritzari eskaera argiekin. Izan ere, Tubos Reunidosek 115 milioi euroko erreskatea eskatu dio Espainiako Gobernuari eta oraindik ez die industria plana aurkeztu sindikatuei. Beharginen ordezkariek euren kezka adierazi dute, enpresak kaleratzeen bidea har dezake eta.
LABek eta ESK-k argitu dute 2020ko erregulazio espedientea hasi zenetik eskatu dizkiotela industria zein bideragarritasun planak zuzendaritzari eta ez dutela erantzunik jaso.
Lan hitzarmena
Horrez gain, erakundeek gogoratu dute zuzendariek zein akziodunen kontseiluek euren soldatak eguneratu dituztela, baina lan hitzarmenaren negoziazioek ez dutela aurrera egin.
Zentzu horretan, sindikatuek exijitu diote zuzendaritzari serio hartzeko negoziazioa, egungo blokeoa gainditzeko eta langileek soldatak zein baldintzak ere eguneratzeko.
ITP eta Tubacex
Tubos Reunidos eta Productos Tubulares enpresetako langileek ITPko beharginen eta Tubacexeko grebalarien babesa izan dute. Gainera, mobilizazio hori bukatu ostean, Tubacexeko grebalariek Eaton enpresako langileen manifestazioan ere parte hartu dute.
Argazkiak: Tubos eta Tubacex enpresetako langileak