Dozenaka lagunek egin dute bat Aiaraldeko Greba Batzordeak eta Euskal Herriko gehiengo sindikala osatzen duten ELA, LAB, ESK, STEILAS, EHNE eta HIRU sindikatuek deitutako mobilizazioan. Iragan urriaren 15ean Amurrion jazotako lan heriotza salatu dute horrela, eta prekarietatea jarri dute gertakari horren erdigunean.
Ostiralean -urriak 15-, 54 urteko langile bat aldamio batetik erori zen, Amurrioko Goiena kaleko etxebizitza bateko obra batean. Segurtasun mekanismoek huts egin eta bizia galdu zuen bertan.
Hildakoa Amurrioko bizilaguna zen, herriko eraikuntza enpresa txiki bateko langile autonomoa. Urriaren 17an egin zuten hileta udalerriko Santa Maria elizan bertan.
Urteko bigarren lan heriotza
Amurriokoa 2021ean Aiaraldean jazotako bigarren lan heriotza izan zen, eta Euskal Herrian erregistratutako 51.a. Ekainaren 10ean Oiartzungo Transportes Gexako 47 urteko garraiolari bat hil zen Orozkoko gasolindegian gertatutako lan-istripu baten ondorioz. Frantzian kargatutako materiala Asturiasera (Espainia) garraiatzen ari zen langilea, eta geldialdia egin zuen Orozkon. Materiala eusteko mekanismoan harrapaturik zendu zen langilea.
Iaz, aldiz, Aiaraldeko zazpi behargin hil ziren lanean zeudela.