Bilera irekiak deitu ditu “Ankerkeriari STOP” dinamikak datozen egunetarako. Bihar (azaroak 24) egingo dute lehena, Amurrioko Kultura etxean, 19:00etan. Agurainen ere bilduko dira, ordu berean, udaletxean. Gasteizen, aldiz, hilaren 29an egingo dute asanblada, Judimendikoak auzo elkartean.
Bi helbururekin egin dituzte deialdiak: Galder Barbado eta Aitor Zelaiaren kasua berriz “eszena publikora” eramatea eta “elkartasun sareak indartzea”. Gogorarazi dute 10 hilabete igaro direla Entzutegi Nazionalak bi gazteak 4 urteko espetxe zigorrera, urtebeteko zaintzapeko askatasunera eta 10 urteko inhabilitaziora kondenatu zituenetik, "armak eta munizioak gordetzea" egotzita. Espainiako Auzitegi Gorenean jarri zuten helegitea, abokatuek absoluzioa eskatu baitzuten, fiskalak 8 urteko kartzela zigorra eskatzen zuen bitartean.
Gauzak hala, salatu dute bi gazteek ezin izan dutela bizitza normalik egin izan azken hilabeteetan, eta edozein unetan atxilotu ahal dituztela.
Duela bi urte atxilotu eta espetxeratu zituzten Barbado eta Zelaia. 6 hilabete igaro zituzten kartzelan, eta baldintzapean aske geratu ziren gero. Aurtengo urtarrilean epaitu zituzten Entzutegi Nazionalean, eta hamar egun beranduago jaso zuten sententzia.
