Iñaki Bea hurrengo astean joango da Dominikar Errepublikara hango futbol selekzioaren ardura hartzeko. Printzipioz, bi urtez hautatzailea izango da, baina bere betebeharrak zabalagoak izango dira. "Gogorra izango da, hango futbol eredua profesionalizatu behar baitut, entrenamenduen metodologiatik hasita", azaldu du amurrioarrak.
Abentura horretan sartuta zegoela, Laliga Smartbank-en aritzen den klub baten eskaintza heldu zitzaion, CD Mirandésena, hain zuzen. Hala ere, jokalari ohiak konpromisoa hartu zuen Dominikar Errepublikako federazioarekin, eta eutsi egin dio bere hitzari.
Nazioen Liga
Beak aurten bertan izango du erronka zuzena. Izan ere, ekainean Nazioen Ligako 4 partIda jokatuko ditu Dominikar Errepublikak eta bere multzoko lehenengo postua lortuz gero, Urrezko Koparako sailkatuko lirateke. Aintzat hartu beharra dago herrialde hori selekzioen 2. mailan dagoela.
Iñaki Beak CD Mirandes futbol taldeko eskaintzari egin dio uko Dominikar Errepublikako hautatzaile izateko
Horregatik, Iñaki Beak ezarri dituen xedeen artean dago Europan aritzen diren jokalari dominikarrak selekzioaren deia onartzea: "Batzuekin ez dut ezta saiakera egingo, badakidalako ezezkoa emango dutela. Adibidez, Mariano edo Junior Firporekin. Ordea, Tano edo Quezadarekin hitz egiteko asmoa daukat".
Merkatu berriak jokalarientzat
Amurrioarraren buruan dago kirol esparruan eragitea absolutuak ez diren selekzioetan ere, eta futbolarien ikuspegia aldatzea. "Nire erreferente bat da Curaçao. Herrialde hori Herbereetako kolonia izan zen. Orain Patrick Kluivert da bere entrenatzailea eta lortu egin du Holandan bizi diren jokalariek selekziora batzea. Futbolari horiek badakite Holandak ez dituela deituko, baina baliatzen dute aukera ezagutzera emateko. Horrek ireki dizkie ateak MLS -Estatu Batuetan- edo Mexikon jokatzeko. Antzeko eredua izan dute Costa Rican", aipatu du Beak.
Futbolaren ospea handitzea eta jokalarien ibilbidea profesionalizatzea dauka buruan amurrioarrak, besteak beste
Horretarako, entrenatzaileak uste du kirolean ez ezik, beste esparrutan ere eragin beharko duela, eta futbol ordezkariekin elkarlanean arituko da, Europako kluben interesa sortzeko.
Kirola indartu
Amurrioarrak duen beste helburuetako bat da futbola sustatzea Dominikar Errepublikan: "Beisbola da kirol famatuena han, baina futbola hasi da jarraitzaileak irabazten. Esaterako, emakumezkoen selekzioa oso ona da eta Munduko Kopa irabazi dezake. Nire asmoa da euren entrenamenduetara ere joatea, ikus dadin kirol bera dela, eta elkar babestu behar dugula".
Etenaldiaren amaiera
Jose Luis Mendilibarren bigarren entrenatzailea izan ostean, Iñaki Beak 2021ean hasi zuen bere ibilbidea bakarka, eta Futbolari Espainiarren Federazioak lana eman zion azaroan. Atsedena hartu eta gero, gogotsu dagoela futbol profesionalera itzultzeko azpimarratu du.