AZKEN ORDUKOA

Hiru eguneko greba deitu dute Megatech enpresan, lan hitzarmen berriaren alde

Hiru eguneko lanuztea prestatu dute Megatecheko sindikatuek hurrengo asterako. / Aiaraldea

Hurrengo astean izango dira lanuzteak, irailaren 20an, 21ean eta 22an. Hala ere, sindikatuak prest daude negoziatzen jarraitzeko zuzendaritzarekin.

Lan hitzarmena berriaren negoziazioei bultzada emateko, Megatech enpresako langile batzordeak hiru eguneko greba deitu du hurrengo asterako. Irailaren 20an, 21ean eta 22an lantegiko zein bulegoetako txanda guztietako beharginei bideratutako proposamena da.

Neurriak bat egiten du uda hasieran adostutakoarekin. Izan ere, langileek lanuzteak egitea onartu zuten ekainean. Sindikatuek aldarrikatu dute aurreko lan hitzarmena duela 21 hilabete iraungi zela eta geroztik ezarritako erregulaziorako enplegu espedienteek zein inflazioak beharginen erosmen ahalmena murriztu dutela

Aurrerapausoak, baina ez nahikoak

Langile batzordeak eta zuzendaritzak 20 bilera baino gehiago egin dituzte lan hitzarmenaren korapiloa askatzeko, baina aldeek talka egiten dute bi puntutan: enpleguaren bermea eta inflazioa. 

Hitzarmen berriari begira, enpresak uste du espedienteen erabilera dela bermea lanpostuak mantentzeko, eta sindikatuak ez daude horrekin ados. Bestalde, Megatecheko arduradunak prest daude KPIa erregulatzeko, baina ez orain arte sortutako atzerapenak ordaintzeko.

Horri gehitu behar zaio enpresak nahi duela bi lan egun gehiago sartzea egutegian, jantokiko plusa kentzea behargin berriei eta sartzen direnak kategoria baxuagoan egotea.

Akordioa greba baino lehen

Sindikatuek baloratu dute, horrenbeste denbora igaro ostean, 4 orduko lanuzteak edota egun bakarreko greba ez direla nahikoa enpresaren jarrera aldatzeko. Horregatik, hiru eguneko mobilizazioa deitu dute.

Langileei bidalitako komunikazioan, erakundeek azaldu dute malgutasunez jokatu dutela, alternatibak aurkeztuta eta atzo, trukean, "mafioso" deitu diela zuzendaritzak.

Edonola ere, borondate guztia adierazi dute zuzendaritzarekin akordioa lortzeko eta, hori eginda, lanuzteak bertan behera uzteko.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide