Amurrioko Udaleko Berdintasun Mahaiak ez ohiko bilera egin du gaur, Otsemeak Talde Feministak salatutakoa lantzeko. Izan ere, Amurrioko udaltzain batek iruzkin matxista zuen bideoa zabaldu zuen asteburuan sare sozialetan.
Udal Gobernu Taldeak proposamena eraman du batzarrera eta alderdi guztiek ontzat jo dute. Horrela, Amurrioko udaltzainak berdintasunari eta indarkeria matxistaren prebentzioari buruzko prestakuntza espezifikoa egingo du, Berdintasun sailetik lantzen ari den Berdintasun Planaren barruan.
Zehazki, bideoa zabaldu zuen agenteak trebakuntza mota bat jasoko du, baina gainerako poliziek ere izango dute beste mota bateko formazioa.
Gaiari buruz, Txerra Molinuevo alkateak honakoa adierazi du: “Gertaera horiek, udal plantillarekin berdintasunaren eta indarkeria matxistaren prebentzioaren arloko sentsibilizazioan eta prestakuntzan lan egiteko beharrari buruzko gogoeta eginarazten digute, batez ere herritarrekin eta, bereziki, indarkeria matxistaren biktimekin zuzenean aritzen diren langileekin”.
Zehazki, egitasmoak hurrengo helburuak izango ditu:
- Genero-teoria ulertzen laguntzea eta horretaz jabetzea, horrek gure gizartean dakarren egiturazko banaketa eta horren ondorioak, emakumeen eta gizonen artean zergatik dauden aldeak, eta esleitutako rolak bereizteak eta hierarkizatzeak zeri erantzuten dion ulertzeko.
- Mugimendu feministaren historiaren eta borrokaren ezagutza eta aitorpena sustatzea, maskulinitate hegemonikoen deseraikuntzan esku hartzeko esparru teoriko gisa.
- Gaur egungo sisteman gizonek, taldean zein banaka, bizi duten sozializazio-prozesua ezagutaraztea eta identifikatzea, gure gizartean nagusi diren eredu maskulinoen berrikuspen kritikoa egitea, eta beste aldaketa- eta eraldaketa-erreferente batzuk indartzea.
- Egitura matxista horretatik eratorritako ideien, pentsamenduen, jarreren eta portaeren ordezko aukeren identifikazioa erraztea, eta haren ondorioen dimentsio pertsonala eta taldekoa ebaluatzea.
- Gizonek berdintasunaren alde egiten duten lanean dauden antolaketarako esperientzia desberdinak ezagutaraztea, eta esperientzia horietarako hurbilketa proposatzea, "ekinean ikasteko" erreferentziazko eredu gisa.