Saskibaloi txapelketa antolatu zuen atzo Aiaraldeko Gazte Koordinadora Sozialistak (GKS) Amurrioko Juan Urrutia plazan. Ekimena "arrakastatsua" izan zela nabarmendu dute antolatzaileek, 16 taldek hartu baitzuten parte guztira. "Horrez gain, hainbat pertsona bertaratu zen partidak ikustera, eta ekimenak balio izan zuen jendeak elkar ezagutzeko, Amurrion giro ona sortzeko eta kirolaz gozatzeko", azaldu dute.
Norgehiagoka laburrak antolatu zituzten, 10-12 minutukoa. Baina finala apur bat luzeagoa izan zen, berdinketa egon baitzen. Azkenean, 'Joordan Poole' taldea gailendu zen.
Honakoa ez da GKSk eskualdean antolatzen duen lehen kirol jarduera. Laudion Gazte Olinpiadak antolatu ditu eragileak, Suziri Jai Batzordearekin eta Gazte Asanbladarekin elkarlanean. Horrez gain, elkartasun futbito txapelketa antolatu zuten urte hasieran Amurrion, duela urtebete Laudion Ertzaintzak atxilotutako gazte baten alde.
Etorkizunera begira, GKSko kideek ez dute baztertzen mota honetako aisialdi ekintzak egiten jarraitzea, "azkenak izan duen arrakasta" ikusi ondoren.
Argazkiak: GKS Aiaraldea