Bilbao Athletic eta Deportivo Alaves B taldeek partida izango dute gaur arratsaldean Basarte futbol zelaian. Hasieran Amurrio Clubak zabaldu zuen norgehiagoka 18:30ean abiatuko zela, baina gaur iragarritako eguraldi beroa eta alerta laranja aintzat hartuta, atzeratu dute 19:00ak arte.
Sarrerak 3 euro balioko du eta umeek zein 65 urtetik gorako ikusleek doan sartzeko aukera izango dute.
Bi amurrioar ohi lehoiekin
Euskal derbiak eskualdean ezagunak diren bi jokalari jarriko ditu futbol zelaian. Horietako bat luiaondoarra da, Aingeru Olabarrieta Capelo. Aiararra aurrelaria da eta hegalean jokatzen du.
Iaz 31 partidatan parte hartu zuen Athletic Clubeko Ohorezko Mailako gazte taldearekin eta hiru gol egin zituen. Horrez gain, Espainiako 18 urte azpiko selekzioarekin lau aldiz jokatu du.
Amurrioko Etorkizuna taldetik fitxatu zuen Bilboko taldeak eta Lezaman zortzi denboraldi egin ditu Aingeruk. Aurten filialean arituko da eta gazte mailatik talde horretara igaroko den kide bakarra izango da, Baskonian militatu gabe.
Luiaondoarra ez ezik, Aymane Jelbat ere arituko da Basarten. Udan Bilbao Athleticek Barakaldotik fitxatu zuen Marokon jaiotako jokalaria eta bere trebakuntza garaian Amurrio Clubeko kide oso garrantzitsua izan zen. Lagunarteko partida bat jokatu du Jelbatek lehen taldearekin.
Euskal taldeen harrobi aiararra
Berez, Aingeru Olabarrieta ez da Athleticen aritzen aiarar bakarra. Izan ere, Ibaiganeko klubak Oihan Mimenza ere fitxatu du Etorkizuna taldetik. Oraindik oso gaztea bada ere, sei gol egin ditu jadanik Athletic 2010 taldearekin.
Talde babazorroko kidea da Iker Fernández ere eta horri gehitu behar zaio Sarai Gandarias luiaondoarrak ere Deportivo Alaveseko atea zaintzen duela.