Burubio Kulturguneko kideak atsekabe daude egun hauetan, larunbatean aurreikusita zuten kontzertua bertan behera utzi behar izan zutelako eta zuzeneko emanaldiak eten behar izan dituztelako, momentuz.
Edonola ere, hori ez da euren ondoezaren arrazoi nagusia, baizik eta Amurrioko Udalak erabili dituen komunikazio bideak erabaki horretarako: "Ostiralean gure kideetako bat, kasualitatez, Burubion zegoelarik heldu zen jakinarazpena. Justu une horretan berak notifikazioa jaso izan ez balu, postontzian utzi izango luketeen, eta auskalo noiz begiratuko genukeen. Horrek, gerora, arazo larriak ekarri ahal zituen. Izan ere, larunbatean polizia agertu zen inguruetatik".
Elkarteko kideen ustez, "poliziak lokala itxi ahal zuen eta ondorio larriak ekarri. Izan ere, hemen kontzertuetaz gain jarduera gehiago daude: entsegu lokalak, ikastaroetarako lokalak. Eta horrez gain, isuna jasotzeko arriskua zegoen. Ez dira horren kontziente izan eta horrek tristura sortu digu".
Larrialdiko irteera eta komunikazioa
Berez, Burubio Kulturguneko kudeatzaileek ez dute zalantzan jartzen itxieraren arrazoia eta ulertzen dute: "Txosten tekniko batek adierazten du lokalak bigarren irteera bat behar duela, larrialdietarako, eta hori konpontzeko bidea topatu behar dugu. Arazoa da gaur egun ez dakigula zehazki zer egin behar dugun kontzertuak eskaintzeko, Udalak ez digu zehaztu".
Aiaraldea Komunikabidea harremanetan jarri da Amurrioko Udalaren prentsa zerbitzuak eta horrek berretsi dio tokiko erakundeak ezin diola baimenik eman Burubiori kontzertuak egiteko larrialdi eta sute araudia ez duelako betetzen: "Bigarren irteera bat behar dute eta ez dago modurik eraikitzeko. Arabako Suhiltzaileak ere egon dira han proposatzeko nola eraiki bigarren irteera bat ez dute asmatu."
Etsipena sortu diena erabakiaren kudeaketa izan da: "Amurrioko Udalarekin harreman bizia dugu. Udalak aitortzen du gure jarduera eta, esaterako, ikastaro batzuk hemen eskaintzen dira. Harreman ona eta bizia daukagu teknikariekin. Esaterako, aste honetan Kultura eta Jai teknirakiekin bildu behar ginen gure hitzarmenaren eta jaien inguruan hitz egiteko. Horregatik ez dugu ulertzen zergatik ez digun udalak berk jakinarazi beste modu batean, zuzenean, kontzertuak egiteko baimenik ez genuela. Ez dauka zentzurik gure azpiegiturak erabiltzea, adibidez, argazkigintza ikastaroak hemen egiteko, eta gero horrelako erabakiren berri ez ematea".
Informazioa hedabideengatik
Egunek aurrera egin ahala, gainera, sentsazioak okerrera egin du. "Hedabide batean irakurri dugu alkatearen ahotik atzeko partean larrialdiko irteera jartzea ez dela posible, eskailera bat erabili beharko genukeelako eta horrek ez duelako ahalbidetzen ebakuazioa. Lehenengo aldia da horrelakorik entzuten dugula, iruditzen zaigu zintzotasun falta egon dela Udalaren aldetik hau kudeatzeko orduan eta horrek harridura sortzen digu", ziurtatu du kideetako batek.
2016an irekita
Hainbat bazkideren ekarpenarekin ireki zuten Burubio Kulturgunea 2016an eta azken urteetan euskal musika talde ugariren erreferentea bilakatu da tokia. Esaterako, Zea Maysek bertan probatu zuen bere azken diskoaren zuzenekoa eta Berri Txarrakek bere agur biran txertatu zuen. Horrez gain, Durangoko Azokarekin ere kontzertuak antolatu ditu. Entseguetarako lokalak ere baditu, Amurrioko eta eskualdeko taldeentzat.
