Aldai kaleko aparkalekua ordezkatzeko asmoa du Amurrioko Udalak. Egungo orube berdinean lurrazpiko aparkaleku bat eraikitzea da Tokiko Gobernuaren asmoa. EAJk eta PSE-EEk iragan astean aurkeztutako 2023-2027 Agintaldi Planaren barruan bildu dute egitasmoa, datozen urteetan gauzatzeko asmoz.
Aldai kaleko aparkalekuak ehun ibilgailurentzako espazioa du gaur egun, eta etorkizuneko lurrazpiko proiektuak beste hainbesterentzako tokia izango luke. Proiektuak, halaber, libre utziko luke aparkalekuak gaur egun okupatzen duen orubea, bertan beste proiektu batzuk garatzeko aukera ahalbidetuz.
Mugikortasunari lotutako obrak
Honakoa ez da mugikortasunaren arloan Amurrioko Udalak esku artean duen proiektu bakarra. Epaitegien inguruan 55 plazako aparkaleku bat eraikitzeko proiektuak aurrera jarraitzen du. 2021ean Eusko Jaurlaritzak Elexondo kaleko 1.900 metro koadroko lursaila lagatu zion tokiko gobernuari, 52.872,28 euroren truke, azpiegitura hori garatzeko. Honezkero abiatu dituzte horri lotutako zenbait lan, Lucas Rey kaleko egokitzapena, tartean. Halaber, aparkaleku honen kontrako ahotsak azaldu dira ere; Aiaracompost taldeak sinadura bilketa bultzatu zuen, adibidez.
Azkenik, Agintaldi Planean jaso bezala, autobus geltoki berria eraikitzeko lanei hasiera eman diete honezkero. Araba kaleko biribilguneko markesina kendu, eta Amurrio Antzokiaren aurrean geratuko dira autobusak aurrerantzean, errepidearen bi noranzkoetan.
