Aste Santuko Kirol Kanpusa antolatuko du Etorkizuna Futbol taldeak aurten ere. Urteetako hutsunearen ondoren iaz berreskuratu zuten kanpusa antolatzeko ohitura, eta ekimenaren balorazio "oso positiboa" egin zuten. “Futbolaren bitartez hainbat balio transmititu nahi izan genituen: kiroltasunez jokatzea, disfrutatzea, taldean aritzeko jarrera egokia izatea… eta lortu genuela esan dezakegu”.
Iazko emaitza onaren ondoren, aurten ere, Pazko asteko lau egunetan kirol ekimenaz gozatzeko aukera izango dute 2017 eta 2010 urteen artean jaiotako eskualdeko gazteek; apirilaren 2tik 5era hain zuzen ere. Kanpusa Amurrioko Refor kirolgunean egingo dute 9:30etatik 13:30etara.
Aurten ere iazko ildotik jarraitu nahi dute futbol entrenamenduak eta kirol-ekinzta ludikoak uztartuz. Gainera, atezainentzako entrenamendu espezifikoa ere eskainiko dute bertan.
Izena emateko azken eguna
Aste Santuko Kanpusean interesa duen orok gaurkoa du izena emateko azken eguna. Inskripzioak 75 euroko prezioa izango du, eta 50 euro batera izena ematen duten anai-arreben kasuan. Prezio horren barruan sartu dute parte-hartzaile guztiek jasoko duten ekipazioa, asegurua edota argazki-sorta.
Bi bide daude izena emateko. Lehenengoa Internet bidez, Etorkizuna taldearen helbide elektronikoaren bidez: etorkizunaamurrioko@gmail.com. Bigarren bide bat ere jarri dute abian, 674 731 415 telefonora deituta.
