Motorra berotzeari ekin dio Amurrioko Emakumeon* Sareak Martxoaren 8ra begira. Emakumeen Nazioarteko Eguna larunbatean izango da aurten eta, hori profitatuta, goizetik arratsaldera arte luzatuko dute egitaraua, "Faxismoaren aurka, ausardia eta aliantza feministak" lemapean.
Mobilizazioarekin hasiko dira 13:00etan, Amurrioko plazatik abiatuta. 14:30ean, aldiz, herri bazkaria egingo dute toki berean, euria eginez gero, Mendiko Eskolara mugituko duten arren. Tiketak martxoaren 2ra arte egongo dira salgai Selene frutadendan, Bai Bada Liburudendan eta Txokogorri tabernan.
Amurrioko Emakumeon* Sareko kideek uste dute orain "une egokia" dela mota horretako otordu bat antolatzeko. Izan ere, "geroz eta zabalagoa da" herrian sortzen ari diren sarea, eta hitzordua baliatu nahi dute "aliantzetan sakondu" eta "Amurrioko Mugimendu Feministaren genealogiak" lantzeko.
Egitasmo batzuk prestatuko dituzte horretarako bazkal ostean, "tribiala" edo "bingo musikatua", kasu.
Bilerak hilero
Sareko kideek gogora ekarri dute 2024ko azaroan ireki zutela Villa Fe eraikineko espazioa, eta nabarmendu dute "emakume nahiko" hurbildu zirela.
Horri lotuta, gogorarazi dute hilabeteko lehenengo astelehenetan egiten dituztela bilera irekiak gune horretan, 19:00etan. Dena den, hurrengo zita martxoaren 5era mugitu dute, 3ko mobilizazioekin bat egin ez dezan.
