Iaz erdietsitako maila mantenduko du Amurrioko Krosak aurtengo edizioan ere. World Athletics Silver aintzatespena lortu zuen kirol probak azken edizioan, eta sei urteko ibilbidean nazioarteko izaera izan zuen lehendabizikoz. Aurtengo edizioak bide berdinetik jarraituko du. Horrela iragarri zuten antolatzaileek sare sozialen bidez zabaldutako mezuan. Izan ere, ADOC elkarteak antolatutako zirkuituan sartu da berriro ere Amurrioko kirol hitzordua.
Mundu mailako kros zirkuiturik onenaren izendapena du ADOC elkartearen egutegiak, horrela berresten dute Espainiako Atletismo Federazioak, Europako Nazioarteko Federazioek eta mundu mailako World Athletics federazioak. Amurrioko Kroseko antolatzaileek "harrotasuna" adierazi dute, zirkuitu horren parte izateko aukeragatik.
Adoc-eko egutegi ofiziala argitaratu da datorren kross denboraldirako. Harro munduko kross zirkuiturik onenaren barruan egoteagatik! / Calendario oficial @asociacionADOC para la próxima temporada de cross. ¡Orgullosos de pertenecer al mejor circuito de cross del mundo! pic.twitter.com/wOft9WFBY4
— Amurrioko Krosa // Cross de Amurrio (@amurriokokrosa) July 31, 2025
Abenduaren 28an
Honezkero iragarri dute VII. Amurrioko Krosaren data: abenduaren 28an izango da, Refor kirolguneko zirkuituan. World Athletics Silver aintzatespenak sona mediatikoa eskainiko dio lasterketari, eta hainbat telebista katek zuzenean eskainiko dute ekitaldia.
Amurrioko Kroseko antolatzaileek iaz lortutako marka gainditzeko lanean ari dira. Mundu osoko 700 kirolari batu ziren azken edizioan, horien artean maila oso altuko atletak. "Antolakuntza lanetan gabiltza lasterketa bikaina eskaintzeko. Finantziazioan ere koska bat egin nahi dugu gora, ahalik eta atleta onenak Amurrion egon daitezen bermatzeko", adierazi dio Pablo Mas Oinkariak taldeko kideak Aiaraldea Komunikabideari.