Amurrio Trailek gaur bertan zabaldu du abenduaren 23an eta 24an egindako bi ekimenen bitartez (Babio 16 ordu Non Stop eta Babio Igoera) 3.144 euro jaso dituela APAFAI elkartearentzat.
Aiaraldean autismoa duten herritarrekin aritzen da APAFAI eta senideek osatzen dute, nagusiki. Iaz ikusi zituzten euren buruak horretara behartuak, APNABIren aldetik jasotzen zuten zerbitzua bertan behera geratu baitzen.
APAFAIk, esan bezala, iaz abiatu zuen bere ibilbidea eta edozein zerbitzu abiatzeko, ezinbestekoa du finantzazioa. Berez, Amurrio Trailek urtero hautatzen du elkarte bat babes ekonomikoa bideratzeko, eta azken edizioan APAFAI laguntzea izan da kirol taldearen erabakia.
Duela bi urte, esaterako, 6.161 euro eskuratu zituzten Arabako Minbiziaren Kontrako Elkartearentzat, aurreko edizioan 6.075 euro eman zizkioten Euskal Herriko Down Sindromea Fundazioari eta 2021ean 7.218 euro izan ziren Adela EH elkartearentzat bildutakoak. Beste edizio batzuetan aurtengo zenbakietatik hurbilago geratu da bilketa. Adibidez, 2018an 4.536 euro izan ziren AEFATentzat eta 2019an 3.335 euro izan ziren, Bihotzez Elkarteari bideratu zituztenak.