Zabaleko ikastetxeko eraikin zaharrak irisgarritasun irizpideak betetzen ez zituela salatu zuen Eginaren Eginez elkarteak urtarrilean. Zaraobe Institutuko Gizarteratze Zikloko ikasleekin saioa egitekoak izan ziren bertan, baina Zabalekoko frontoira lekualdatu behar izan zuten jarduera, eraikina ez baitzen irisgarria.
Aurreko ostegunean Amurrioko Udaleko zinegotzi Arantzazu Saratxagak Azalera podcasta bisitatu zuen eta gaiaren inguruan galdetzeko aukera izan genuen bertan. Azaldu zuenez, Udalak ez du aurreikusten eraikin horretan irisgarritasuna hobetzeari begira neurririk hartzea: "Haurreskola dago bertan, baina lehenengo solairuan kokatuta dago eta ez du inolako irisgarritasun arazorik. Horretaz gain, Udalak ez du inolako jarduerarik martxan bertan, eta beraz, momentu honetan ez dugu inolako inbertsiorik egiteko aurreikuspenik".
Eskola jarduera martxan dagoen ikastetxe publikoak irisgarriak direla azpimarratu nahi izan du Saratxagak: "Zabaleko eskola dagoen eraikinean ez dago inolako arazorik irisgarritasunarekin. Udalak bere garaian inbertsio batzuk egin zituen: igogailua jarri zen eta arrapala batzuk eraiki ziren". Halaber, gehitu du inbertsio berriak egingo dituztela bai aipatutako ikastetxean eta baita Mendiko eskolan ere.
Hemen ikusi daiteke Azalera podcasteko elkarrizketa osoa: