Tentsioz eta hedabidez beteriko goiza bizi dute gaur Tubos Reunidoseko Amurrioko langileek. 10:00etan hasi da bilera langile erakundeen eta enpresaren artean eta ez da inolako adostasunik egon. Sindikatuek ziurtatu diote Aiaraldea Komunikabideari ez dutela espedientea sinatu eta orain bai, itxi da kontsulta epea. Hortaz, multinazionalaren benetako asmoak 15 egun barru jakingo dira.
Altzairutegia ixteko erabakia
Akordioa ezinezkoa egin duen puntua argia izan da: Tubos Reunidosek altzairutegia itxi nahi du bai ala bai eta sindikatuek mantendu dute enpresak ez duela neurri hori justifikatu.
Berez, multinazionalak egindako azken eskaintza izan da orain arte egindako proposamen ekonomikoa irteera boluntarioak sustatzeko, behin-behineko langile guztiak kaleratzea, altzairutegia ixtea eta logistika atala kanporatzea. Altzairutegiari dagokionez, konpainiak iragarri du batzordea sortu eta sei hilero biltzeko asmoa duela, aztertzeko kanpoan altzairua erosteko neurria egokia den edo azpiegitura berriro irekitzeko beharra dagoen. Sindikatuen ustez, azken plan hori ez da serioa.
Gainera, Tubos Reunidosek beste baldintza bat jarri du: espedientearen sinaketari buruzko galdeketa egitea Amurrioko lantegian ere.
Amurrioko ELAk, LABek eta ESK-k adierazi dute eurentzat kontsulta epea astelehenean amaitu zela eta edozein akordio epaitegira eramango zutela.
Behin hori mahai gainean jarrita, etenaldia egin dute, CCOOk eskatuta. Bilerara itzuli direnean Amurrioko ELAk, LABek eta ESK-k adierazi dute eurentzat kontsulta epea astelehenean amaitu zela eta edozein akordio epaitegira eramango zutela. Gogoratu beharra dago Trapagarango ELAko kideen babesarekin luzatu zela kontsulta epea eta horietako bat ez zela agertu bileran. Amurrioko sindikatuak salatu dutenez, Whatsapp mezu baten bitartez delegatu zuen bozka eta hori ez da legala.
Bestalde, UGTk bere jarrera berretsi du eta argudiatu du zuzendaritzak ez duela frogatu altzairutegia ixteko premia. CCOOk, aldiz, positibotzat jo du Tubos Reunidosen proposamena eta galdeketa eginda espedientea sinatzeko prestutasuna agertu du bozketa bidez hori erabakiz gero.
Gauzak horrela, ez da akordiorik egon eta enpresaren esku geratu da espedientearen kudeaketa.
Hasierako jarrerak ez dira aldatu
Berez, bilerak aurreikusitako gidoia jarraitu du. Batzarrean sartu baino lehen, ELAk, LABek eta ESK-k berretsi diete bertaratutako langileei ez dutela 301 lanpostu suntsituko duen espedientea sinatuko. Gaur lau orduko lanuztea baino ez dute fabrikan, ez zutelako denborarik izan greba eguna deitzeko, eta ezin izan dira guztiak bertaratu.
Amurrioko UGTk atzo argitu zuen ez duela enplegu suntsiketa babestuko multinazionalak ez duelako justifikatu.
Trapagarango egoera
Amurrioko borroka giroa, edonola ere, oso bestelakoa da Trapagaranen, atzo bozketa egin baitzuten eta 251 beharginek babesa eman zioten kaleratze ez traumatikoak egiteari. Hori bai, Amurrioko sindikatuek salatu dutenez, ez dute aipatu 301 bajak bete arte, guztiak ez direla boluntarioak izango.
Meatzaldeko galdeketak hautsak harrotu zituen atzo, baina behin UGTk adierazita ez diola oniritzia emango espedienteari, negoziazio mahaian ez dago gehiengorik kaleratzeak gauzatzeko sindikatuen sinadurarekin.
Bilerako sarrera, tentsioaren irudia
Azken egunetan gertatutakoaren isla izan da batzarraren sarrera. Trapagarango ELAko ordezkariak ez dira ate nagusitik sartu (gogoratu beharra dago langile horiek ez dutela bete sindikatuaren irizpidea) eta CCOOkoak oihu eta txistu artean barneratu dira.
Behin bilera hasita, Tubos Reunidoseko langileek mobilizazioak egin dituzte hiriburuko kaleetan.
Argazkiak: Tubacexeko langileak, Aitor Aspuru Saez