Gaur Tubos Reunidoseko bulegoen aurrean hedabide mordoa bildu da 10:00ak aldera. Izan ere, Enpresa Batzordearen gehiengoak (ELAk. LABek, ESK-k eta CNT-k) prentsaurrekoa deitu du, eta atzo konpainiak borondatezko hartzekodunen konkurtsoa abiatu eta gero, jakin-mina handia zen.
Edonola ere, greban buru-belarri sartuta dauden erakundeek ez dute diskurtsoa asko aldatu. Komunikabideen galderen aurrean, argitu dute maiatzaren 7an deitu duten bozketan ez dutela parte hartuko eta bilera ez dutenez deitu eurek, ez dutela aintzat hartuko: "Demokraziaren oinarria ez da bakarrik bozkatzea, funtsezko eskubideak ere badaude. Guk greba deitu dugu. Guztiok daukagu greban parte hartzeko edo lanera joateko eskubidea, baina borrokatu nahi ez dutenek, ez ditzaten gure konpromisoa eta eskubideak oztopatu".
"Demokrazia ez da bakarrik bozkatzea, oinarrizko eskubideak ere badira eta greba egitea horietako bat da"
Gainera, zalantzan jarri dute deialdiaren zilegitasuna: "Ez ditugu sinadurak ikusi eta enpresako zuzendaritzak eta batzarraren deitzaileek kopuru ezberdinak eman dituzte. Aurrekari arriskutsua da horrelako bozketa bat onartzea".
Bihar bilera zuzendaritzarekin
Sindikatuen bozeramaileek aurreratu dute bihar goizean bilera egingo dutela Tubos Reunidoseko zuzendaritzarekin eta horren zain daudela erabakiak hartzeko. Dena den, enpresa arduradunei exijitu diete benetako informazioa eramatea. "Duela gutxi elkartu ginen Carlos Lopez de las Heras CEOarekin eta esan zigun ez zegoela hartzekodunen konkurtsorik", gogoratu dute.
Bestalde, mesfidantza agertu dute bilerari dagokionez ere: "Enplegua Erregulatzeko Espedientea kudeatzeko Trapagaran eta Amurrioko lantegiak batu zituzten, baina bihar bilera bat egongo da Amurrion goizean eta beste bat Trapagaranen arratsaldean. Uste dugu argi dagoela langileak banatzen saiatzen ari direla".
Hain zuzen, maiatzaren 7ko galdeketa logika horren barruan sartu dute. "Batzarraren deitzaileak zuzendaritzatik gertu daude eta espedientea hasi zenean informazio okerra eman zieten langileei apropos", ziurtatu dute. Horrez gain, beste behargin batzuek nabarmendu dute deitzaileak Lan Hitzarmen Kolektibotik kanpoko kontratatuak direla.
Zuzendaritzari ardurak eskatu
Dena den, sindikatuek eraman duten mezu argiena izan da hedabideek eta erakundeek arreta mugitu behar dutela grebalarietatik zuzendaritzara: "Hartzekodunen Konkurtsoa abiatu izanak agerian utzi du euren kudeaketaren porrota. Altzairutegiaren itxiera ez zen irtenbidea eta proposatu zituzten kaleratzeak ordaintzeko dirurik eta asmorik ez zuten".
"Hartzekodunen konkurtsoa deitu izanak agerian utzi du zuzendaritzaren porrota finantzazioa lortzeko"
"Konkurtsoa ez du eragin ez grebak, ez espedientearen akordio ezak. Lehenago zetorren kaudimen gabezia egoerak eragin du eta enpresako zuzendaritza ez da gai izaten ari horri buelta emateko", aldarrikatu dute
Gardentasuna behingoz
Halaber, aldarrikatu dute gardentasuna behar dela prozesuan, are gehiago sartu diren egoera kritikoan: "Hemen badago kontatu ez den zerbait: Alde askoren interesak ez datoz bat. Hartzekodun batzuek zor guztia kobratu nahi dute, inbertitzaile posibleak daude, eta nahiago izan dezakete zor-karga gutxiagoko eszenatoki batean sartu. Hori guztia existitzen da eta gertatu da langileei informazioa ezkutatzen zitzaien bitartean".
"Inbertitzaile posibleak daude"
Sindikatuek negoziatzeko eta akordioak lortzeko prestutasuna adierazi dute, baina benetako partaidetza aldarrikatu dute.
Erakunde publikoen esku-hartzea
Azkenik, Langile Batzordeak mezua bidali die erakunde publikoei, bereziki, Eusko Jaurlaritzari eta Espainiako Gobernuari. Beharginen erakundeek gogoratu dute enpresa barruan badaudela inbertitzaileak eta horie exijitu behar dietela dirua jartzea, ez SEPIri ezta kanpoan daudenei ere: "30 milioiko zorra genuen eta erabaki zuten 200 milioikoa sortzea, 170 milioi euro horiek euren artean banatuta. Erabaki horietan BBVAk parte hartu du eta dirua jaso du dibidenduen eta interesen bitartez. Orain akziodunen artean desagertzen ari da. Horiei exijitu behar zaie ardura eta erakunde publikoek egin behar dute, diru publikoa jaso baitu enpresak".