Tubos Reunidosek jarraitzen du hedabideetan titularrak eragiten, bere bi ardatz nagusietan: “Hirurok auziarekin” duen balizko harremana batetik, eta hartzekodunen konkurtsoa bestetik.
Lehen ardatz judizialari lotuta, Francisco Irazustak aste hasieran Entzutegi Nazionalera bidalitako gutuna dago. Hainbat hedabidek (Eldiario.es edota TVE, besteak beste) eman dute Tubos Reunidoseko presidente ohiak Santiago Pedraz epaileari helarazitako idazki horren berri.
Bere aurkako akusazio guztiak ukatu ditu Tubos Reunidoseko presidente ohiak, Entzutegi Nazionalera bidalitako gutun batean.
Dokumentu horretan, bere aurkako akusazio guztiak ukatu ditu Irazustak. Bere hitzetan, Tubos Reunidosek ez zion dirurik eman Vicente Fernandez Guerrerori SEPIren mailegua jasotzen laguntzeko. Horrez gain, multinazionaleko buru ohiak dio "Gabonetako zorion-agurrak" bidaltzera mugatu zela Fernandez Guerrerorekin zuen harremana, eta ez zuela berari buruz ezer gehiago jakin Tubos Reunidosek mailegua jaso eta lau hilabete igaro arte, orduan batu baitzen Fernandez aholkulari moduan enpresara. Era berean, aipatu du ez zekiela Fernandezen Mediaciones Martinez enpresak Hirurok taldearekin harremanik zuenik.
Kontuan hartu behar da Irazusta ez dela Tubos Reunidosi emandako maileguagatik “Hirurok auzian” inputatutako pertsona bakarra. Carlos Lopez de Las Heras ere dago auziperatuta, Amurrioko enpresako egungo CEOa.
Sara Aagesen ministroaren adierazpenak
Bestetik, gaur Senatuan deklaratu du Sara Aagesenek, Espainiako hirugarren presidenteorde eta Trantsizio Ekologikorako eta Erronka Demografikorako ministroak. PPk eskatuta hitz egin du, SEPIren kudeaketa ikertzen duen batzordean. Bertan, ministroak esan du ez zuela gobernuaren presiorik jaso Tubos Reunidosen erreskatea burutzeko, eta ziurtatu du bere ministerioak ez zuela multinazionalari emandako maileguaren aurkako txostenik plazaratu.
Balizko bi interesdun Tubos Reunidosen erosketan
Tubos Reunidoseko hartzekodunen lehiaketari dagokionez, Tubacex eta Sidenor erosketan interesa izan dezaketenaren hipotesia indartzen doa. María Ubarretxena sailburuak gaiari buruzko adierazpenak egin ditu Radio Vitorian eskainitako elkarrizketan. Eusko jaurlaritzako ordezkariak "oso positibotzat" jo du bi enpresa interesatuta egotea, baina ohartarazi du oraindik goiz dela eta "zuhur" jokatu behar dela. Izan ere, hainbat hilabeteko prozesua geratzen da oraindik aurretik.