ELAk komunikatu du uztailaren 20tik aurrera (hau da, hurrengo astelehenean abiatuta) Amurrioko kale garbitzaileek greba egingo dutela lan hitzarmen berria aldarrikatzeko.
Sindikatuak azaldu du sei behargin finko daudela grebara batzeko deituak eta duela urte eta erdi iraungi zela lan hitzarmena. Langile erakundeak salatu du PreZero enpresak ez duela inolako eskaintzarik egin negoziazioek iraun bitartean, "egoera ekonomikoa txarra dela argudiatuta".
Kale garbitzaileen exijentziak honako hauek dira: KPIaren gainetik dauden soldata igoerak, batzarrak egiteko ordu gehiago, lizentzien hobekuntzak eta antzinatasunaren aitortza hobetzea.
ELAk erantsi du Amurrioko Udala ez dela inplikatu lan gatazkari konponbidea bilatzeko, nahiz eta tokiko erakundearen zerbitzua izan.
Berez, ez da beharginen eta enpresaren artean gertatu den lehen arazoa, duela bi urte mobilizazioak egin baitzituzten konpainiak ez zielako soldatak eguneratu nahi.
Bigarren greba mugagabea PreZerorekin
Antzeko osagaiak eta protagonistak dituen beste greba bat dago deitua sektore berean uztailaren 20rako. Izan ere, Aiaraldeko Kuadrillako zabor bilketa zerbitzuan ere lanuztea aurreikusi dute.