Azarotik aurrera titulartasun publikokoa izango da AP-68 autobidea. Arabako Foru Aldundiak bidesarietako prezioak murrizteko erabakia azaldu zuen atzo bertan: %70 merkeago autoentzat, %50 merkeago kamioientzat.
Erabakiak, ordea, Baranbioko bizilagunen samindura eragin du. Izan ere, autobidearen doakotasun ezak bere horretan mantenduko du trafiko astunarekin herrian bizi duten arazoa. Kontrara, egoera larriagotu egin dela salatu dute, Barazarreko portuan ere bidesaria instalatu dutenetik.
Trafikoa astuna herrian barrena
Baranbioko bizilagunek 50 urte daramate herria zeharkatzen duen trafiko astuna AP-68 autobidetik doan desbideratzea exjitzen. Kamioien igarotzeak bertako herritarren eguneroko bizitza baldintzatzen duela salatu du Jesus Mari Bernaola administrazio batzordeko lehendakariak.
Hartara, egoera bideratzeko herritarrek aurkeztutako alternatiba eta proposamen oro ezerezean geratu dela salatu dute Baranbioko herritarrek; azkena herrian espaloiak egiteko eskaria. "Zerbait larria gertatu arte inork ez du bere gain hartuko egoera bideratzeko beharra", kexu da Bernaola.
Alegazioa Diputazioan
Egoeraren aurrean alegazioa aurkeztu du Baranbioko Administrazio Batzarrak Arabako Foru Aldundian, AP-68 autobidearen titulartasun publikoa arautzen duen foru arauaren barruan trafiko astunak Orozko eta Ziorraga lotzen dituen A-2522 errepidea erabiltzeko debekua txertatu dezan.
Mobilizazio gehiago iragarri dituzte ere Baranbioko bizilagunek. 2020 eta 2021 urteetan egin bezala errepidea mozteari ekingo diote berriro irailean, "herritarren eskaria entzuna izan dadin".