Gastronomia izango da protagonista Andra Mari Jaien Bezpera Egunean (abuztuak 12). Janariarekin zerikusia duten bi ekintza egingo dira arratsaldean: Marmitako eta Tortilla Lehiaketak.
Aspaldidanik antolatzen diren ekintza dira. Hori erraz ondorioztatu daiteke bi lehiaketek aurretik dituzten zenbaki erromatarrak ikusita: XXIX. Marmitako Lehiaketa izango da aurtengoa, eta XX. Tortilla Txapelketa. Pagobakarra taldea arduratzen da bi ekimenak egiteaz. “15 urte daramatzagu antolakuntzan”, azaldu du Iñaki Aretxaga Arregik. Bera da, Pablo Abrisketarekin batera, antolakuntzan murgilduen daudenetako bat. “Herriaren alde zerbait egiteko” hartu zuten Pagobakarrakoek euren gain bi txapelketen prestaketa (ordura arte Jai Batzordea zen bi ekimenak aurrera ateratzeaz arduratzen zena).
40 kazuela inguru aurkezten dira edizio bakoitzean, gehienak herriko jendearen eskutik. Hori da, hain zuzen, bi txapelketen helburua: herriko jendea batzea, kanpoko jendeak ere parte hartu dezakeen arren. Gazteak, nagusiak... hainbat adinetako parte hartzaileak daude. “Koadrila moduan aurkezten dira batzuk. Beste batzuk, berriz, familia moduan aritzen dira”.
Dirua traba ez izatea helburu
Sari ugari egoten dira bi lehiaketetan: txapelak, dirua, tartak... Oraindik ez dute zehaztu aurtengo oroigarriak zeintzuk izango diren. Hori bai, argi dute zein izango den klasifikazioan azkena geratzen denarentzako saria, urtero berdina izaten baita: “Egurrezko koilara!”, esan du Aretxagak barre artean. Kanpoko epaile bat arduratzen da puntuazioa egiteaz. “Sukaldari onak ditugu Arrankudiaga-Zollon”.
Hala ere, Aretxagak azpimarratu du sariak baino, parte hartzaile bakoitzari ematen zaion dieta dela garrantzitsuena. Dieta ekonomiko horren bidez parte hartzeko egin beharreko erosketak ia euren osotasunean ordaindu daitezke. Parte hartzerako orduan dirua traba ez izatea bilatzen dute horrela antolatzaileek, ahalik eta herritar gehien gerturatzea baita xedea. “Gero guztiok batera Gizarte Etxearen atzeko aldean afaltzea da garrantzitsuena, horregatik antolatzen ditugu bi lehiaketak”, azaldu du Aretxagak. Berarentzako horregatik da Bezpera Andra Mari jaietako “egunik politena”.