Arrankudiaga-Zolloko EH Bilduko udal gobernuak urtarrilaren 30eko grebarekin bat egingo duela adierazi du ohar baten bidez. Pentsionisten mugimenduarekiko adostasuna eta babesa adierazi dute ere oharrean: “Pentsioena denon afera da, lan baldintzen aldeko borroka ezinbestekoa da eta eskubide sozialak bermatu behar dira”.
Era berean, lau ebazpen nagusi eman dituzte aditzera udaletik: grebari atxikimendua adieraztea, greba egin nahi duten udal langileei erraztasunak ematea, Euskal Herriko Karta Sozialak adostutako Aldarrikapen Taularekin bat egitea eta udalaren ebazpena “Eusko Jaurlaritzari, Nafarroako Gobernuari, Lurraldeko Gobernuari eta Euskal Herriko Karta Sozialari” helaraztea.
Aldarrikapen Taulari dagokionez, Madrileko Gobernuari, Jaurlaritzari eta Nafarroako Gobernuari eta Erkidego eta Lurraldeko Gobernuei hainbat eskakizun egin dizkie udal gobernuak. Horien artean daude 2011 eta 2013ko pentsio murrizketak indargabetzea, 1.080 eta 1.200 euroko gutxieneko pentsioa eta gutxieneko soldata ezartzea (hurrenez-hurren) edota asteko 35 orduko lanaldia ezartzeko eta gizon eta emakumeen arteko soldata eta pentsio-arrakalarekin amaitzeko neurri zehatzak ezartzea.