Abenduko Udal Osoko Bilkuran onartu ziren Arrankudiaga-Zolloko Udalaren 2024rako aurrekontuak. Txutxi Ariznabarreta alkatea pozik dago emaitzarekin. Izan ere, aho batez onartu zen plangintza ekonomikoa, udal gobernuko zein oposizioko kideen aldeko botoekin. “EAJk bost proposamen egin zituen eta txertatu egin genituen”, azaldu du gobernuburuak, eta nabarmendu du kontuek aurten gaindituko dutela lehenbiziko aldiz 2 milioi euroko langa.
Guztira, 2.137.237 euro baliatzea aurreikusi du Udalak. Baina, Ariznabarretaren hitzetan, horri gehitu behar zaio tokiko erakundeak milioi bat eurotik gorako soberakina duela pilatuta. Gauzak hala, Udala “oso egoera ekonomiko onean” dagoela uste du gobernuburuak.
Aurten gaindituko du udal aurrekontuak 2 milioi euroen langa, Txutxi Ariznabarreta alkateak nabarmendu duenez.
Hainbat proiektu esku artean
Hainbat proiektutara bideratuko dute plangintzan jasotako dirua. Oxinburuko azpiegiturak martxan jartzea, Patzuergoko ura ponpatzeko estazioa egitea eta Atxetako gizarte etxearen edota Zolloko udaletxe zaharraren berritzea izango dira proiektu esanguratsuenetako batzuk.
Uribarrin, aldiz, errepidea eta komun publikoak berrituko dituzte, eta argiteri berria jarriko dute Arrankudiagako plazan, errepide azpiko tunelean eta Zabale auzoan.
Horrez gain, bi plan potente osatzeari ekingo dio tokiko erakundeak aurten: Hiri Antolamendurako Plan Orokor (HAPO) berria eta trantsizio energetikorako plana. Azken horretan, udal eraikinetako eta kaleetako argiteria aztertuko dituzte, eta azken generazioko LED argiak jarriko dituzte, orain daudenak “zaharkituta” daudelako. Bukatzeko, eguzki plakak jarri nahi dituzte udaletxean, 2021an eskolan egin bezala.
Bizkaiko pentsiodunen mozioa
Aurrekontuez gain, Bizkaiko pentsiodunen plataformak aurkeztutako mozioa ere izan zuten eztabaidagai abenduko plenoan, eta hori ere aho batez onartu zen.