Korrikalari azkarrak izan gara aurtengoan aiaraldearrak. Gorputza berotzeko, ahalik eta lasterren oheratzeko edo azken asteetako entrenamenduek emandakoak erakusteko izan den, nork bere motiboak izango zituen. Baina arrazoiak arrazoi, Artziniegatik sartzean zeramatzan ordu erdiko atzerapena zeroan jarri da korrikalariak Ugaora iritsi direnerako.
Eskualdea agurtu aurretik, Arakaldon bisita azkar bezain sutsua egin du, berezitasun batekin gainera: Udalak Tubos Reunidosen eta Maderas de Llodion greba mugagabean dauden langileei laga izan die kilometroa, ibilbide osoan zehar presente egon diren aldarrikapenak beste behin ere lehen planora ekarriz.
Arrankudiagan zazpi izan dira Korrikak egindako kilometroak eta une gogoangarri ugari utzitakoak, hala nola herriko hainbat haurrek, goizeko ordu txikiak izanagatik ere, lekukoa harro hartu dutenean.
Euskararen aldeko lasterketak piztutako garra gaur bizirik mantentzeko asmoa dute udalerrian, eta egun osoko egitaraua antolatu dute horretarako. Hain zuzen ere, goizeko hamarretan Korrika txikiak hartuko ditu herriko kaleak eta 15:00ak aldera jolasak egingo dituzte, 16:30ean txistorradarekin hasi arte. Kirol ginkana izango da arratsaldeko ekintza izarra, ume eta gazteak martxan jarriko dituena. Iluntzean Joxe Mendizabalek jarriko du musika eta bokatak egongo dira Gizarte Etxean.
Argazkiak: Aimar Gutierrez Bidarte eta AEK-Korrika.