Etxebizitzaren auzia izan zuen mintzagai Txutxi Ariznabarreta Zuberok iragan osteguneko Azalera podcastean. Izan ere, amaituta daude udalerrian sustatutako 12 udal etxebizitza publiko kooperatiboak, eta Gabonetarako aurreikusi dute giltzak entregatzea. Horrez gain, Eusko Jaurlaritzarekin hitzartutako alokairuzko 10 etxebizitzen eraikuntza datorren urtean hastea aurreikusi du alkateak.
Esparru horretatik harago, bestelako gaiak ere izan zituen hizpide Ariznabarretak elkarrizketan: idazkari kontu-hartzailearen gabezia kronikoa, Atxetako lokala edota Xarmantaren eraikinaren etorkizuna, besteak beste.
Bukatzeko, datorren udal hauteskundeetara berriz aurkeztuko den galdetu genion egungo alkateari. Berak erantzun zuen ez dagoela bere esku, EH Bilduren oinarriei dagokiela erabakia hartzea eta bera hor egoten jarraituko duela. Dena den, aurreratu zuen berarentzat "logikoagoa" litzatekeela "jende gazteagoak" hartzea ardurak.