Artziniegako Jaietako ekintza “mugiezinak” dira Arteko Landako bazkaria eta bazkalostean fanfarrea baten laguntzarekin egiten den jaitsiera larunbatean. Bazkaria aspaldidanik egiten da. “Duela 60 urte ere egiten zen”, azaldu du Mateo Lafragua artziniegarrak, “erromeria egiten zen eta gero berbena zegoen herrian”.
Fanfarrea batekin jaistearen tradizioa, berriz, ez da horren zaharra, Lafraguaren esanetan. “Hasieran pertsona bakoitza bere kasara jaisten zen herrira landatik, oinez batzuk eta autoz beste batzuk, klaxona jotzen”. 70. hamarkadan izan zen aldaketa: “Jai Batzordeak autoak zelaira sartzea debekatu zuen lehenbizi, eta handik gutxira atera zen jaitsiera antolatzearen ideia, kalejiran eta musikaz lagundurik. “Hasieran gatazkak egon ziren autoz jaitsi nahi zutenen eta oinez zihoazenen artean”, oroitu du Lafraguak.
"Ura! Ura!"
Urteak aurrera joan ahala, baina, oinezkoen kalejirak lortu du nagusitasuna. Gaur egun ekintza jendetsua da, hainbat koadriletako kideak biltzen dituena. Jendeak aurrerantz eta atzerantz dantzatzen du, fanfarrea ahalik eta gehien luzatzeko asmoarekin, eta askok ‘Ura! Ura!’ oihukatzen diete balkoietan dauden auzokideei, jaien alde bustitzeko prest.