aiaraldea.eus

Soldata jaitsierak eta kaleratzeak egongo dira CEL taldean

Erabiltzailearen aurpegia Erredakzioa   Ekonomia  Artziniega

Lanpostuak 225 izatetik 145 izatera igaroko dira eta %9 eta %20 bitarteko jaitsierak emango dira soldatetan.

Soldata jaitsierak eta kaleratzeak egongo dira CEL taldean
Mobilizazio ugari egin dituzte enpresa taldeko beharginek. / ELA | Ikusi handiago | Argazki originala

Akordioa sinatu zuten atzo CELeko Enpresa Batzorde gehienek Lucart talde italiarrarekin. Lucart da enpresa-taldea erosteko prest azaldu zen inbertitzaile bakarra, baina hainbat baldintza jarri zuen horretarako: langile kopurua txikitu eta lan-baldintzak okertzea, hain zuzen.

Azken egunetan negoziazioetan buru-belarri egon dira langileen ordezkariak talde italiarreko kideekin, eta modu horretan adostu dute akordioa. Langileen batzar orokorra egin zuten Zallan, eta beharginen gehiengoak egin zuen bat hitzarmen horrekin: aldeko 150 boto egon ziren, aurkako 15 eta 10 zuri.

Modu horretan, lanpostuak 225 izatetik 145 izatera igaroko dira eta %9 eta %20 bitarteko jaitsierak emango dira soldatetan. Lanpostu gehienak aurre-jubilazioen bidez suntsituko dira, baina lau “kaleratze traumatiko” egongo dira baita ere. ELAk (CELen gehiengoa duen sindikatuak) adierazi du akordioa ez dela ona izan, baina langileek eginiko borroka nabarmendu du. “Mobilizazio ugari egin dugu, Enkarterrin nahiz administrazioen aurrean”.

Artziniegako lantegia
Gauzak hala, ezbaian dago Artziniegako lantegiaren etorkizuna, bertako ekoizpen-linea kentzea baitzen Lucarten asmoa. Hala ere, ELAko kideek adierazi dute oraindik ez dakitela nola eragingo dien akordioak herriko instalazioei.  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa