Aiaraldea hedabidea: "Euskara ezin da izan lehia politikorako aldagai"

Erredakzioa 2018ko api. 17a, 16:08
Deskargatu Info Ahotsak :

Udal aurrekontuak PPren babesarekin onartzeko erabaki zuen Artziniegako EAJk Aiaraldea hedabidearekin zuen hitzarmena kentzea. Aiaraldea hedabideak euskara lehia politikotik kanpo uztea eskatu du, eta dei egin die herritar, alderdi eta erakundeei euskararen normalizaziorako tresnak babestera.

Osteguneko osoko bilkuran onartu ziren udal-aurrekontuak, EAJko 4 zinegotziren aldeko bozekin, EH Bilduren kontrako 4 botorekin eta PPko hautetsi bakarraren abstentzioarekin. PPren abstentzioa eskuratzeko baldintza bakarra izan zen komunikabideari diru-laguntza kentzea, eta Iñigo Gomez alkatearen gobernu taldeak bide eman zion eskaerari. Ondorioz, 1.500 euroko diru partida alboratu du EAJk 2018ko egitasmoetatik, euskarari oraindik eta laguntza gutxiago eskainiz aurten.

Artziniegako udal gobernuak hartutako erabakiaren ondotik, ezer baino lehen, Aiaraldea Hedabideko lantaldetik eskerrak eman nahi dizkiegu azken egunetan babes mezuak helarazi dizkiguten herritar, eragile eta hedabideei, bereziki Artziniegako pertsona eta elkarteei. 

 

Gertakari larri honen aurrean, argi adierazi nahi dugu euskara ezin dela lehia politikorako ez aurrekontuen negoziaketarako aldagai izan. Kezkagarria eta larria da udal gobernuarentzat euskara estrategikoa ez izatea. Era berean, ozen salatu nahi dugu Joseba Elejalde PPko zinegotziaren euskarafobia. Euskararen erabilerari erreparatuta behar handia duen herria da Artziniega, baita eskualdea bera ere. Horregatik dira hain beharrezko erabilera bultzatuko duten proiektuak edota tresnak.  

Euskararentzat, aurrekontu guztiaren %0.39 soilik
2018ko aurrekontuetan Artziniegako Udalak euskarara 1.8 milioi eurotik 7.175€ soilik bideratuko ditu, aurrekontu osoaren %0.39, inguruko udalen partidetatik oso azpitik: Euskararen Astera eta bestelako jardueretara 4.500€, Aiarako Kuadrillako ekintzetara 375€ eta euskara ikasteko diru-laguntzetara 2.300€. Datuak ikusita, euskararen normalizazioaren alde lanean gabiltzan eragile garen heinean, kezkagarria da euskal hizkuntzak udalean duen garrantzia eza. Nola da posible, udal gobernuaren aldetik, euskarak estrategikotasunik ez izatea? Hartutako erabakiaren ondorioz, aurten euskararen sustapenak Artziniegan oraindik eta baliabide ekonomiko gutxiago izango ditu.

Aiaraldean euskararen ezagutza eta erabilera asko hazi dira azken hamarkadetan. 2016ko datuen arabera, 2 urtetik gorako biztanleen herena da euskaraduna; duela 25 urte ez zen %10era iristen. Ildo beretik, ia euskaldunak %20 dira. Hortaz, euskaraz hitz egin edo ulertzeko gai dira biztanleen erdia baino gehiago. Aurrerapauso guzti hauek dira Artziniegako herritarrek eta eragileek euskararen alde egindako lan handiaren isla; nahiz eta egunerokoan erabiltzeko urratsa ematea falta den.

Horregatik, euskarak tresnak eta arnasguneak behar ditu Artziniegan, gaur egun eskaintzen zaizkion baliabideak baino gehiago. Zentzu horretan, erakunde publiko guztietako planek adierazten dutenez, ezinbestekoak dira euskarazko hedabideak hizkuntzaren normalizaziorako; arnasgune garrantzitsu baitira, eta eremu erdaldunetan are gehiago. Artziniegan euskararen ezagutza datuak igo badira ere, erabilera indartzeko berebizikoak dira Aiaraldea hedabidea bezalako proiektuak.

Hedabidea, euskararen arnasgune Artziniegan
Aiaraldea komunikabideak 7 urte hauetan Artziniegari buruzko 2.087 eduki argitaratu ditu www.aiaraldea.eus webgunearen bidez: 791 agenda deialdi, 370 artikulu, 220 argazki galeria eta 61 bideo. Udalak herriko berriak zabaltzeko aldizkaririk ez duela aintzat hartuta, funtzio sozial handia betetzen du; udalaren zein elkarteen informazioa ezagutzera emateko eta herritarren lorpenak zabaltzeko zinez garrantzitsua da.

Izan ere, tokiko informazioa multimedia formatu ezberdinetan plazaratuz, zuzenean edo zeharka, erdalguneetan euskaraz irakurtzeko eta hitz egiteko ohitura areagotzen ari gara; euskarari eremuak zabaltzen. Era berean, azpimarratzekoa da Artziniegan -eskualdeko gainontzeko herrietan bezala- ikastetxeen bidez hedabidetik euskarari eman zaion bultzada. 2013tik hona 17.000 egunkari (85 ale) banatu dira bertan, horietatik 10.965 Arteko Gure Amako eskolako ikasleen artean. Horrek esan nahi du, elkarlan horri esker -familia bakoitzean bataz beste 4 lagun daudela kontuan hartuta- 800 artziniegarren eskutara ailegatzen dela "Aiaraldea hemen" aldizkaria hamabostero, herritarren erdira gutxi gorabehera. Norabide horretan, Aiaraldea Hedabideak euskararen normalizazioan duen garrantzia eta eraginkortasuna balioan jarri nahi ditugu ohar honen bidez, nola webgunea hala egunkaria euskaraz informatzeko, irakurtzeko eta komunikatzeko tresna garrantzitsu baitira artziniegarrentzat ere. Familia eta gune sozial askotan, esaterako, hedabideko egunkaria edota atariko edukiak izaten dira euskarazko komunikazioari tarte egiteko tresna.

Elkartasun jaia, herritarren eskutik
Aiaraldea hedabidetik, aurrera begira, eguneroko lanaren bidez hedabidetik kazeta formatu ezberdinetan euskarari bide ematen jarraitzeko konpromisoa berresten dugu. Hala, esker beroena helarazi nahi diegu egunotan babes mezuak bidali dituzten artziniegarrei; maiatzaren 12an elkarte ezberdinen laguntzaz "Elkartasun Jaia" antolatzeko proposamena luzatu baitigute udalak kendutako 1.500 euroak eskuratzeko.

2012tik gaur arte, udal guztiek babestu dute egitasmoa. Saraobeko mahaiko ekitaldian 9 udalerrietako alderdi politikoek -PPk barne- sinatu zuten hitzarmena.

PPren beto "euskarafoboa" eta salaketa faltsuak

Joseba Elejalde Artziniegako PPko zinegotziak udal aurrekontuen eztabaidan gezurrak erabili zituen euskararen aurkako fobia garbia izkutatu eta Aiaraldea Hedabidea udalean betatzeko eskakizuna justifikatzeko. Aiara eskualdeko popularren burua ere badenak "hedabide plurala" ez garela adierazi zuen udalbatzan. 
8 urteotako ibilbidean denetariko iritziak eta alderdi guztien albisteak argitaratu eta zabaldu ditugu, horren erakusle dira gurean idatzi duten zutabegileen aniztasuna, eta testigu fidelena da hemeroteka. Gezurretan ari dela ondo daki Elejaldek, are gehiago, bera eta Aiarako PP izan denean argi eta garbi gure informazio eskaerei muzin egin diena (Santiago Abascal eskualdeko popularren presidente zenetik). Hala eta guztiz ere, informazioa eta euren iritziak ere eskuratzeko langa gainditu eta PPren iritziak ere argitaratu izan ditugu urteotan, gure lehentasuna, euskara sustatzeaz gainera, herritarrak ahal bezain ondo informatzea baita. Kuriosoa da gainera, eskualdetik kanpoko PPko egitura eta arduradunekin harreman normalizatua eta ona dugula, bai eta alderdiaren disziplina euskarafobotik ihes egin duten eskualdeko PPko hainbat zinegotzirekin ere (Urduñan zinegotzi izan zen Txema Beascoechearekin eta Laudioko zinegotzi izan diren Paula eta Alvaro Cuestarekin zein egungo Iñigo Pedruzorekin ere). Aiaraldea Hedabideak ez du inoiz eta inon alderdi bakar bat ere ez betatu, eta Elejaldek bezala, hori baieztatzen duena, gezurretan ari da, nabarmen. 
 
Euskararen kontrako neurri hau hartzeko bigarren argudio bat erabili zuen Elejaldek, Aiaraldea "lau lagunek montatatutako txiringito bat dela, empresa pribatu bat". Aiaraldea Hedabidea herritarrek sortu eta garatu duten hedabidea da, ehunka pertsonen lan boluntariori esker heldu dena gaur dena izatera. Aiaraldea Kooperatiba Elkartea da hedabidea kudeatzen duen enpresa herritarra, eskualdeko 250 bazkide erabiltzailek osatzen eta euren poltsikoetatik (desinteresatuki) finantzatzen duten irabazi asmorik gabeko enpresa hain zuzen ere. Irabazi asmorik gabekoa izateaz gainera, Eusko Jaurlaritzak "gizarte ekimeneko" izendapena aitortu zigun, helburu erabat sozialak dituelako; euskararen normalizazioan eta biziberritzean eragitea. Enpresa bat gara bai, baina ez Elejaldek kudeatzen duen familia-enpresa bezalakoa -hau ere guztiz zilegia bada ere-; guk ez dugu gure patrika betetzea eta aberastea helburu, baizik eta jendartearen onura soziala, eta euskararena.
 
Edonola dela ere, Elejaldek ondo daki udalbatzan erabili zuen argudioa erabat faltsua dela; gure hedabidearen kasua hau ez bada ere, euskaraz argitaratzen den edozein komunikabidek baitu, edozein dela bere ildo editoriala edo ideologikoa zein irabazi ekonomikoak izateko asmoa, finantzazio publikoa jasotzeko eskubidea, euskararen normalizazioan ekarpena egiten diotelako. El Correo, Deia, Diario Vasco, Berria edo Gara bezalako komunikabideek, irabazi ekonomikoa duten enpresa egiturak izanagatik ere, finantzaketa publikoa jasotzen baitute egun. Falangeak edo Fundacion Francisco Francok euskarazko komunikabide bat argitaratuko balu, finantzaketa publikoa jasotzeko eskubidea luke. Aiaraldea irabazi asmorik gabea da, inpartziala eta anitza, eta besteek bezala diru publikoa jasotzeko eskubide osoa (eta zoritxarrez beharra) du euskarak bizi duen diglosi egoera gainditzeko.
 
Elejaldek behin eta berriro aldarrikatzen du ez dagoela euskararen kontra, baina bere eguneroko jarduna erabat euskararen kontrakoa da, euskara bera politizatu, eta inpartzialak eta anitzak diren euskarazko komunikabideak betatuz. 1,8 milioi euroko aurrekontu bat onartzeko 1.500 euroko partida euskarari kentzea eskatu eta (okerrena dena) lortu du, eta esaten duenaren kontra, horren ondorioz euskarak oraindik eta baliabide ekonomiko gutxiago izango ditu 2018an Artziniegan. Euskarararen kontra dagoenik nekez topatuko dugu inon, baina bai ordea euskararen kontrako jarrerak praktikan garatzen dituen asko eta asko, Elejalde jauna tartean. Korrikaren lekukoa eramateak ez baitu inor euskararen aldekoago egiten.

Kazetaritza herritar eta independentearen alde lanean jarraituko dugu

Oztopoei aurre eginez, euskaraz informatzen -eta beraz, bizitzen- jarraituko dugu; kazetaritza herritar eta independentea egiten, euskarak ahalik eta espazio zein tresna gehien eskura ditzan. Ildo beretik, eskaera bikoitza luzatzen diogu Artziniegako Udalari: euskararen aurrekontua handitzea, eta Aiaraldea hedabidearekin hitzarmena lehenbailehen berrezartzea. Babesa indartuz, jarrai dezagun euskara eta tokiko informazioa denon eskutik denon eskura jartzen!

Komunikazioa Artziniega

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide